கூடுவாஞ்சேரி பிப்.14: உச்ச நீதிமன்ற உத்தரவுப்படி, தெருநாய்களை நிறுவன பகுதிகளில் இருந்து அகற்றி, நியமிக்கப்பட்ட காப்பகங்களுக்கு மாற்றுவது உள்ளிட்ட பல்வேறு பணிகளை செய்து முடிக்க வேண்டும் என்று, நந்திவரம்-கூடுவாஞ்சேரி நகராட்சி அலுவலகத்தில் நடைபெற்ற ஆலோசனை கூட்டத்தில் அலுவலர்களுக்கு அதிகாரிகள் உத்தரவிட்டனர். செங்கல்பட்டு மாவட்டம், நந்திவரம்-கூடுவாஞ்சேரி நகராட்சி அலுவலகத்தில் பொதுசுகாதாரத் துறை பிரிவு சார்பில் பிராணிகள் பாதை தடுப்பு சட்டத்தின் கீழ் அரசு நிறுவனங்கள், கல்வி நிறுவனங்கள் மற்றும் தனியார் பொறுப்பு நிறுவன அலுவலர்களுக்கு ஆலோசனை கூட்டம் நேற்று நடைபெற்றது. இதில், நகராட்சி கமிஷனர் சந்தானம் தலைமை தாங்கினார். சுகாதார அலுவலர் நாகராஜ், பொறியாளர் வெங்கடேசன், சுகாதார ஆய்வாளர் காளிதாஸ் ஆகியோர் முன்னிலை வகித்தனர். கால்நடை டாக்டர் திருமுருகன் அனைவரையும் வரவேற்றார். சிறப்பு விருந்தினராக செங்கல்பட்டு மாவட்ட கால்நடை பராமரிப்பு துறை உதவி இயக்குனர் நளினி கலந்துகொண்டு கால்நடைத்துறை, சுகாதாரத்துறை, காவல்துறை உள்ளிட்ட அனைத்து துறை அலுவலர்களுக்கும் ஆலோசனை கூட்டம் நடத்தினார்.

கூட்டத்தில், தேசிய நெடுஞ்சாலையுடன் ஒருங்கிணைந்து நகராட்சி அதிகாரிகள், அனைத்து கால்நடைகள் மற்றும் பிற தெருவிலங்குகளை அந்தந்த அதிகார வரம்புகளுக்குள் வரும் நெடுஞ்சாலைகளில் இருந்து அகற்றுவதை உறுதி செய்ய வேண்டும். வேலி மற்றும் வாயில்களின் நிலை, ஏதேனும் கழிவுகள் குவிந்தால் சரிசெய்து நடவடிக்கைகள் எடுக்கப்பட வேண்டும். தவறினால் சம்பந்தப்பட்ட நகராட்சி அதிகாரிகள் அல்லது நிர்வாகிகள் மீது பொறுப்பு நிர்ணயிக்கப்படும். மேற்குறிப்பிட்ட வளாகத்தில் காணப்படும் தெருநாய்களை, உள்ளாட்சி அமைப்புகள் உடனடியாக அகற்றி, 2023ம் ஆண்டு விலங்கு பிறப்பு கட்டுப்பாடு விதிகளின் கீழ், கருத்தடை மற்றும் தடுப்பூசி போட்ட பிறகு, காப்பகங்களுக்கு மாற்றப்பட வேண்டும். அத்தகைய நாய்களை மீண்டும் அதே இடத்தில் விடக்கூடாது. தங்குமிடங்களுக்கு மாற்றப்பட்ட நாய்களுக்கான குறிச்சொல் எண்கள், தடுப்பூசி நிலை, பிடிபட்ட தேதி போன்ற விவரங்களைக் குறிப்பிடுவதன் மூலம் ஒரு பதிவேடு பராமரிக்கப்பட வேண்டும்.

அனைத்து நாய் கையாளுபவர்களுக்கும் பயிற்சி அளிக்கப்பட்டு, பிபிஇ கருவிகள் வழங்கப்பட வேண்டும். பிரத்யேக மற்றும் குறிப்பாக மாற்றியமைக்கப்பட்ட நாய் போக்குவரத்து வாகனம் கிடைக்க வேண்டும். தெருநாய்களின் நுழைவு அல்லது குடியிருப்புக்கு எதிராக 24 மணி நேரமும் விழிப்புணர்வை பராமரிக்க போதுமான பாதுகாப்பு பணியில் ஈடுபடுத்தப்பட வேண்டும். தெருநாய்களை ஈர்க்கும் உணவு ஆதாரங்களைத் தடுக்க, பேருந்து நிலையங்கள், டிப்போக்கள் மற்றும் ரயில் நிலையங்களில் பயனுள்ள கழிவு மேலாண்மை அமைப்புகள் மற்றும் வழக்கமான ஆய்வுகளை நகராட்சி அதிகாரிகள் உறுதி செய்ய வேண்டும். கால் நடைகளை கண்காணித்தல் மற்றும் விற்பனையாளர் அமலாக்கம் தொடர்ந்து செய்யப்பட வேண்டும். தெருநாய்களின் அச்சுறுத்தலைத் தடுப்பதற்காக, கால்நடைகள் மற்றும் பிற தெருவிலங்குகளை நெடுஞ்சாலைகளில் இருந்து அகற்றி, அவற்றை ஒதுக்கப்பட்ட தங்குமிடங்களுக்கு மாற்றுவதற்கான கூட்டு மற்றும் ஒருங்கிணைந்த இயக்கத்தை மேற்கொள்வது, தெருநாய்களை நிறுவன பகுதிகளில் இருந்து அகற்றி, நியமிக்கப்பட்ட காப்பகங்களுக்கு மாற்றுவது உள்ளிட்ட பல்வேறு பணிகளை செய்து முடிக்க வேண்டும் என்று அலுவலர்களுக்கு உத்தரவிடப்பட்டது.