புதுடெல்லி: எதிர்க்கட்சிகளின் கடும் எதிர்ப்புக்கு மத்தியில் தொழில்துறை உறவுகள் சட்ட மசோதா நாடாளுமன்றத்தின் இரு அவைகளிலும் நேற்று நிறைவேற்றப்பட்டது. தொழிற்சங்க சட்டம் 1926, தொழில்துறை வேலைவாய்ப்பு சட்டம் 1946, தொழில்துறை தகராறு சட்டம் 1947 ஆகிய மூன்று பழைய சட்டங்களை ஒருங்கிணைத்து 2020ல் தொழில்துறை உறவுகள் சட்டம் கொண்டு வரப்பட்டது. இந்த சட்டம் கடந்த நவம்பரில் அமலுக்கு வந்தது. தொழில்துறை உறவுகள் சட்டம் அமலுக்கு வந்ததைத் தொடர்ந்து பழைய 3 சட்டங்கள் தாமாக ரத்தாகிவிடும்.

ஆனாலும் இந்த விவகாரத்தில் எதிர்காலத்தில் சட்ட சிக்கல்கள் ஏற்படுவதை தடுக்கும் விதமாக புதிய தொழில்துறை உறவுகள் திருத்த மசோதா மக்களவையில் நேற்று முன்தினம் தாக்கல் செய்யப்பட்டது. இந்த மசோதா மீதான விவாதம் நேற்று நடந்தது. எதிர்க்கட்சிகளின் எதிர்ப்பை மீறி குரல் வாக்கெடுப்பு மூலம் மசோதா நிறைவேற்றப்பட்டது. அதைத் தொடர்ந்து மாநிலங்களவையிலும் உடனடியாக இந்த மசோதா தாக்கல் செய்யப்பட்டு நிறைவேற்றப்பட்டது. பழைய 3 சட்டங்களையும் ரத்து செய்ய அரசுக்கு அதிகாரம் உண்டு என்றும் இதில் எந்த சர்ச்சையும் இல்லை என்றும் எதிர்க்கட்சிகளுக்கு பதிலளித்து பேசிய ஒன்றிய தொழிலாளர் அமைச்சர் மன்சுக் மாண்டவியா கூறியது குறிப்பிடத்தக்கது.