புதுடெல்லி: உலகக் கோப்பை டி20 10வது போட்டியில் நேற்று, நமீபியாவை, 7 விக்கெட் வித்தியாசத்தில் நெதர்லாந்து அணி அபாரமாக வென்றது. உலகக் கோப்பை டி20 10வது போட்டி டெல்லியில் நேற்று நடந்தது. அப்போட்டியில் நமீபியா – நெதர்லாந்து அணிகள் மோதின. டாஸ் வென்ற நெதர்லாந்து பந்து வீச்சை தேர்வு செய்தது.

அதையடுத்து களமிறங்கிய நமீபியா அணியின் துவக்க வீரர் லோரன் ஸ்டீன்காம்ப் 6 ரன்னில் வீழ்ந்து அதிர்ச்சி தந்தார். மற்றொரு துவக்க வீரர் ஜேன் பிரைலின்க், ஓரளவு தாக்குப்பிடித்து 30 ரன்கள் எடுத்து ஆட்டமிழந்தார். பின் வந்த வீரர்களில் ஜேன் நிகோல் லாப்டிஈடன் 42, கேப்டன் கெரார்ட் எராஸ்மஸ் 18 ரன்கள் எடுத்தனர். மற்ற வீரர்கள் சொற்ப ரன்களில் அவுட்டானதால், நமீபியா, 20 ஓவரில் 8 விக்கெட் இழப்புக்கு 156 ரன் சேர்த்தது. அதையடுத்து, 157 ரன் இலக்குடன் நெதர்லாந்து களமிறங்கியது. அந்த அணியின் துவக்க வீரர்கள் மேக்ஸ் டிடவ்ட் 7, மைக்கேல் லெவிட் 28 ரன்னில் அவுட்டாகினர்.

இருப்பினும் அடுத்து வந்த பாஸ் டி லீட் அட்டகாசமாக ஆடி 48 பந்துகளில் 4 சிக்சர், 5 பவுண்டரிகளுடன் 72 ரன் விளாசி கடைசி வரை ஆட்டமிழக்காமல் இருந்தார். அவருக்கு துணையாக நின்ற காலின் ஆக்கர்மேன் 32, கேப்டன் ஸ்காட் எட்வர்ட்ஸ் ஆட்டமிழக்காமல் 18 ரன்கள் விளாசினர். அதனால், நெதர்லாந்து அணி 18 ஒவரில் 3 விக்கெட் மட்டுமே இழந்து 159 ரன் குவித்து 7 விக்கெட் வித்தியாசத்தில் மகத்தான வெற்றியை பதிவு செய்தது. 72 ரன் விளாசி, 2 விக்கெட்டுகளை சாய்த்த நெதர்லாந்தின் பாஸ் டி லீட் ஆட்ட நாயகனாக தேர்வு செய்யப்பட்டார்.