சேலம்: சேலம் வழியாக இயக்கப்படும் மங்களூரு-சென்னை சென்ட்ரல்-மங்களூரு வெஸ்ட் கோஸ்ட் எக்ஸ்பிரஸ் வரும் பிப்ரவரி 1ம் தேதி முதல் எல்.எச்.பி., பெட்டி ரயிலாக மாற்றி இயக்கப்படும் என ரயில்வே நிர்வாகம் அறிவித்துள்ளது. இந்திய ரயில்வே துறையில் நீண்ட தூரம் இயங்கும் ரயில்களை அதிக பாதுகாப்பு அம்சங்கள் நிறைந்த எல்.எச்.பி., (லிங்க் ஹாப்மேன் புஷ்) பெட்டிகள் கொண்ட ரயில்களாக மாற்றி இயக்கி வருகின்றனர். ஜெர்மன் தொழில் நுட்பத்தில் தயாராகும் எல்.எச்.பி., பெட்டிகளை படிப்படியாக முக்கிய வழித்தடங்களில் இயங்கும் ரயில்களில் இணைக்கின்றனர். அந்த வகையில், சேலம் ரயில்வே கோட்டத்தில் உள்ள கோவை, திருப்பூர், ஈரோடு, சேலம் வழியாக மங்களூருவில் இருந்து சென்னை சென்ட்ரலுக்கு இயக்கப்படும் வெஸ்ட் கோஸ்ட் எக்ஸ்பிரஸ் ரயிலை எல்.எச்.பி., பெட்டிகள் கொண்ட ரயிலாக மாற்றுவதாக தெற்கு ரயில்வே நிர்வாகம் அறிவித்துள்ளது.
இதன்படி, மங்களூரு-சென்னை சென்ட்ரல் வெஸ்ட் கோஸ்ட் எக்ஸ்பிரஸ் (22638) வரும் பிப்ரவரி 1ம் தேதி முதல் எல்.எச்.பி., பெட்டி ரயிலாக மாற்றம் பெறுகிறது. மறுமார்க்கத்தில் இயங்கும் சென்னை சென்ட்ரல்-மங்களூரு வெஸ்ட் கோஸ்ட் எக்ஸ்பிரஸ் (22637) வரும் பிப்ரவரி 4ம் தேதி முதல் எல்.எச்.பி., பெட்டி ரயிலாக மாற்றப்படுகிறது. இந்த ரயில், முதல் வகுப்பு ஏசி பெட்டி-1, இரண்டடுக்கு ஏசி பெட்டி-1, மூன்றடுக்கு ஏசி பெட்டி-5, இரண்டாம் வகுப்பு படுக்கை வசதி பெட்டி-9, இரண்டாம் வகுப்பு முன்பதிவில்லா பெட்டி-4, மாற்றுத்திறனாளிகளுக்கான பெட்டி-1, லக்கேஜ் மற்றும் பிரேக் வேன்-1 என மொத்தம் 22 எல்.எச்.பி., பெட்டிகளாக மாற்றப்பட்டு இயக்கப்படுகிறது.
இந்த எல்.எச்.பி., பெட்டிகள், அதிக பாதுகாப்பு அம்சங்கள் கொண்டது. அதிக இருக்கைகள் இருப்பதால், கூடுதல் பயணிகள் பயணிக்க இயலும். அதிவேகத்தில் ரயிலை இயக்கினாலும் அதிர்வுகள் இருக்காது. நவீன கழிவறை மற்றும் டிஸ்க்பிரேக் வசதியும், தீ தடுப்பு கருவிகள், சிறந்த முறையிலான குளிர்சாதன வசதி உள்ளிட்ட அதிநவீனங்களை கொண்டவை என ரயில்வே அதிகாரிகள் தெரிவித்தனர்.
