புதுடெல்லி: இந்து வளர்ச்சி விகிதம் என்ற சொல் முழு நாகரீகத்தையும் அவமதித்தது என்று பிரதமர் மோடி பேசினார். டெல்லியில் நடந்த இந்துஸ்தான் டைம்ஸ் உச்சி மாநாட்டில் பிரதமர் மோடி நேற்று கலந்து கொண்டு பேசினார். அவர் கூறியதாவது: அடுத்த 10 ஆண்டுகளில் அடிமை மனநிலையிலிருந்து நாட்டு மக்கள் முற்றிலும் விடுபட வேண்டும். உலகம் நிச்சயமற்ற தன்மைகளால் நிறைந்திருக்கும் ஒரு நேரத்தில் இந்தியா நம்பிக்கையால் நிரம்பி வழிகிறது. தன்னம்பிக்கை இல்லாமல் எந்த நாடும் முன்னேற முடியாது. இன்றைய ஒவ்வொரு துறையும் காலனித்துவ மனநிலையை கைவிட்டு பெருமையுடன் புதிய சாதனைகளை இலக்காகக் கொண்டுள்ளது.

வளர்ந்த பாரதத்தின் இலக்குகளை அடைவதில் இந்த காலனித்துவ மனநிலை ஒரு பெரிய தடையாக மாறியுள்ளது. அதனால்தான் இன்றைய பாரதம் இந்த மனநிலையிலிருந்து தன்னை விடுவித்துக் கொள்ள பாடுபடுகிறது. இன்றும் கூட, உலகெங்கிலும் பலர் இந்தியாவை உலகளாவிய வளர்ச்சி இயந்திரம் என்று வர்ணிக்கும்போது, ​​மிகச் சிலரே இந்த சாதனையைப் பற்றி பெருமையாகப் பேசுகிறார்கள். இதை யாராவது எப்போதாவது இந்து வளர்ச்சி விகிதம் என்று குறிப்பிட்டிருக்கிறார்களா?.

ஆனால் இந்தியா இரண்டு முதல் மூன்று சதவீத வளர்ச்சி விகிதத்தை எட்டுவதற்கு கூட போராடிய நேரத்தில் இந்த சொல் பயன்படுத்தப்பட்டது. இந்தியாவின் மெதுவான வளர்ச்சி எப்படியோ இந்து நாகரிகத்தின் விளைவுதான் என்பதே இதன் மூலம் வலியுறுத்தப்படும் செய்தி. இப்போது ஒவ்வொரு பிரச்சினையையும் வகுப்புவாதமாக்குபவர்கள் அப்போது இந்த வார்த்தைக்கு எந்த ஆட்சேபனையும் தெரிவிக்கவில்லை. இந்த வார்த்தை புத்தகங்கள் மற்றும் ஆராய்ச்சி ஆவணங்களின் ஒரு பகுதியாக மாறியது. இந்து வளர்ச்சி விகிதம் என்ற சொல் நமது முழு நாகரீகத்தையும் அவமதித்தது. இவ்வாறு அவர் பேசினார்.