தமிழில் பிரபுதேவாவுடன் ‘சார்லி சாப்ளின் 2’ என்ற படத்தில் நடித்த அதா சர்மா, சிம்புவின் ‘இது நம்ம ஆளு’ என்ற படத்தில் ஒரு பாடலுக்கு கவர்ச்சியாக ஆடியிருந்தார். ‘தி கேரளா ஸ்டோரி’ என்ற படத்தின் மூலம் இந்தியா முழுக்க பிரபலமான அவர், தற்போது ‘சூப்பர் வெள்ளி’ என்ற படத்தில் சூப்பர் ஹீரோயினாக நடித்துள்ளார். இதில் அவர், ‘அக்ரோமாடோப்சியா’ என்ற நோயால் பாதிக்கப்பட்ட பெண் வேடமேற்றுள்ளார். நிறக்குருடு கேரக்டருக்கு இந்த உலகம் கருப்பு, வெள்ளையாக மட்டுமே தெரியும்.
அதிகமான பொறுப்புகளை விட ஓய்வெடுக்கவும், தூங்கவும் மட்டுமே விரும்பும் இந்த சூப்பர் ஹீரோயின் கதையை ராஜேஷ் பச்சானி எழுதி இயக்கியுள்ளார். மற்ற சில சூப்பர் ஹீரோயின்களை போல் இல்லாமல், இதிலுள்ள சூப்பர் ஹீரோயின் எப்போதும் சோம்பேறியாகவும், தூங்கியபடியும் இருப்பார். ஒருவேளை அவர் சுறுசுறுப்புடன் எழுந்து புறப்பட்டால், இந்த உலகத்தை அழிப்பதற்காகவே செல்வார். இதுபோன்ற வித்தியாசமான ஒரு கேரக்டரில் அதா சர்மா நடிக்கிறார்.
