நோராவின் ஆபாச நடனத்தால் சர்ச்சை; ஒன்றிய அரசு, சென்சார் போர்டுக்கு தேசிய மகளிர் ஆணையம் நோட்டீஸ்

சண்டிகர்: ‘கேடி: தி டெவில்’ என்ற திரைப்படத்தில் இடம்பெற்றுள்ள ‘சர்கே சுனரி தெரி சர்கே’ என்ற பாடல் புதிய சர்ச்சையை கிளப்பியுள்ளது. நடிகர் சஞ்சய் தத் மற்றும் நடிகை நோரா ஃபதேகி நடித்துள்ள இந்தப் பாடலில், இரட்டை அர்த்த வசனங்களும் ஆபாசமான காட்சிகளும் இடம்பெற்றுள்ளதாகக் கூறி, அரியானா மாநில மகளிர் ஆணையத் தலைவர் ரேணு பாட்டியா தணிக்கை வாரியத்திற்கு கடிதம் எழுதியுள்ளார். இந்தப் பாடலில் 1952ம் ஆண்டின் சினிமா சட்ட விதிகளுக்குப் புறம்பாக பாலியல் ரீதியான தூண்டல்கள் இருப்பதாக ஆணையம் குற்றம் சாட்டியுள்ளது. இது தொடர்பாக தேசிய மனித உரிமைகள் ஆணையமும் தணிக்கை வாரியம் மற்றும் ஒன்றிய அரசுக்கு நோட்டீஸ் அனுப்பியுள்ளது. மேலும், இந்தப் பாடல் ‘போக்சோ’ சட்டப்பிரிவுகளின் கீழ் விதிமீறல்களைக் கொண்டுள்ளதாக வழக்கறிஞர் ஒருவர் புகாரளித்துள்ளார். இதுகுறித்துப் பேசிய பாடகர் அர்மான் மாலிக், ‘வணிக ரீதியான பாடல்கள் இவ்வளவு தரம் தாழ்ந்து செல்வது வருத்தமளிக்கிறது’ என்று தெரிவித்துள்ளார். துருவா சார்ஜா, ஷில்பா ஷெட்டி நடித்துள்ள இந்தப் படம் வரும் ஏப்ரல் இறுதியில் வெளியாக உள்ளது குறிப்பிடத்தக்கது. தமிழில் தோழா படத்தில் ஒரு பாடலுக்கு நோரா ஃபதேகி நடனமாடி உள்ளார்.