காய்ச்சலுடன் நடித்த பிரார்த்தனா

பியாண்ட் பிக்சர்ஸ் ஜெயவர்தன் தயாரிப்பில், பிரதீப் ரங்கநாதன் உதவியாளர் மரியா ராஜா இளஞ்செழியன் எழுதி இயக்கியுள்ள ‘ஹேப்பி ராஜ்’ என்ற படம், வரும் 27ம் தேதி திரைக்கு வருகிறது. ஜி.வி.பிரகாஷ் குமார், ஸ்ரீகவுரி பிரியா, பிரார்த்தனா நாதன், ஜார்ஜ் மரியன் நடித்துள்ளனர். நீண்ட இடைவெளிக்கு பிறகு அப்பாஸ் நடித்துள்ளார். ஜஸ்டின் பிரபாகரன் இசை அமைத்துள்ளார். படம் குறித்து பிரார்த்தனா நாதன் கூறுகையில், ‘ஜி.வி.பிரகாஷ் குமாருடன் பணியாற்றியதை நினைத்து பெருமைப்படுகிறேன். ஸ்ரீகவுரி பிரியா அழகாக இருக்கிறார்.

படப்பிடிப்பு நாட்களில் ஓய்வின்றி கடுமையாக உழைத்தோம். அப்போது எனக்கு கடுமையான காய்ச்சல் இருந்தது’ என்றார். ஜி.வி.பிரகாஷ் குமார் கூறும்போது, ‘ஆதிக் ரவிச்சந்திரன் இயக்கத்தில் நான் நடித்த ‘த்ரிஷா இல்லனா நயன்தாரா’ என்ற படத்தில் இருந்த எனர்ஜி இப்படத்தில் இருக்கும். ஆனால், அது ஒரு ‘A’ சர்ட்டிபிகேட் படமாக இருந்தது. அந்த எனர்ஜியை எடுத்துக்கொண்டு, குடும்பம் மற்றும் நண்பர்கள் அனைவரும் பார்க்கக்கூடிய ஒரு ஜாலியான படமாக இப்படத்தை உருவாக்கியுள்ளோம்.

இயக்குனருக்கும், நடிகருக்கும் இடையே ஒரு நல்ல பிணைப்பு இருந்தால் படம் வெற்றிபெறும். அந்த பிணைப்பு எனக்கும், மரியா ராஜா இளஞ்செழியனுக்கும் நன்றாக இருந்தது. ஒரு லாபகரமான படமாக இதை உருவாக்கியுள்ளனர். அப்பாஸ் சார் நடித்துள்ளார். அவருக்கு சிறந்த கம்பேக் படமாக இது அமையும். ஸ்ரீகவுரி பிரியா, ஜார்ஜ் மரியன், பிரார்த்தனா நாதன் சிறப்பாக நடித்துள்ளனர். ஜஸ்டின் பிரபாகரனின் இசை வேற லெவல். கண்டிப்பாக இந்த படம் ரசிகர்களை ஏமாற்றாது. தந்தை, மகன் பாசத்தை இக்கதை நினைவூட்டும்’ என்றார்.