போட்டித்தேர்வு பயிற்சிக்கு விண்ணப்பிக்கலாம்

சிவகங்கை, நவ. 14: சிவகங்கை கலெக்டர் ஆஷாஅஜித் விடுத்துள்ள செய்திக்குறிப்பில் தெரிவித்துள்ளதாவது:தமிழ்நாடு ஆதிதிராவிடர் வீட்டுவசதி மற்றும் மேம்பாட்டுக் கழகம் (தாட்கோ) சார்பில் சென்னையில் உள்ள முன்னணி பயிற்சி நிறுவனத்துடன் இணைந்து 100 ஆதிதிராவிடர் மற்றும் பழங்குடியின மாணவ, மாணவிகளுக்கு பட்டயக்கணக்காளர் இடைநிலை, நிறுவன செயலாளர் இடைநிலை, செலவு மற்றும் மேலாண்மை கணக்காளர் இடைநிலை ஆகிய போட்டி தேர்வில் தேர்ச்சி பெற பயிற்சி அளிக்கப்படவுள்ளது. பயிற்சி பெற விரும்புபவர்கள் ஆதிதிராவிடர் மற்றும் பழங்குடியினர் இனத்தைச் சார்ந்தவர்களாகவும், இளநிலை வணிகவியல் பட்டம் பெற்றிருக்கவும் வேண்டும். குடும்ப ஆண்டு வருமானம் ரூ.3லட்சத்திற்கு மிகாமல் இருத்தல் வேண்டும். ஒரு வருட பயிற்சிக்கு தேர்வு செய்யப்படுபவர்களுக்கு தங்கும் வசதி மற்றும் உணவு வசதிகள் ஏற்பாடு செய்து தரப்படும். பயிற்சியில் சேர www.tahdco.com என்ற இணையதள முகவரியில் விண்ணப்பம் பதிவு செய்யலாம்.இவ்வாறு தெரிவிக்கப்பட்டுள்ளது.

The post போட்டித்தேர்வு பயிற்சிக்கு விண்ணப்பிக்கலாம் appeared first on Dinakaran.