தெஹ்ரான் : ஹோர்முஸ் நீரிணையை கடந்து செல்ல முயற்சிக்கும் எண்ணெய் கப்பல்கள் மீது குண்டு வீசுவோம் என ஈரான் எச்சரிக்கை விடுத்துள்ளது. ஈரான் அணு ஆயுதத்தை தயாரிக்க முயல்வதாக குற்றம்சாட்டி அமெரிக்காவும், இஸ்ரேலும் இணைந்து கடந்த 28ம் தேதி கூட்டு தாக்குதலை தொடங்கின.இதில் ஈரான் உச்ச தலைவர் அயதுல்லா அலி கமேனி கொல்லப்பட்டார். இதற்கு பழி தீர்க்கும் வகையில் ஈரான் ராணுவம் இஸ்ரேலை மட்டுமின்றி அமெரிக்க ராணுவ தளங்கள் அமைந்துள்ள அரபு நாடுகளான ஐக்கிய அரபு எமிரேட்ஸ், சவுதி அரேபியா, கத்தார், குவைத், பக்ரைன், ஜோர்டான் மீது ஏவுகணை, டிரோன்களை ஏவி தாக்குதல் நடத்தி வருகிறது. 4வது நாளாக இப்போர் தீவிரமடைந்து, விரிவடைந்தும் வருகிறது.
இதுமட்டுமின்றி, ஹோர்முஸ் ஜலசந்தி பகுதியை கச்சா எண்ணெய் கொண்டு செல்லும் கப்பல்கள் பயன்படுத்த கூடாது என ஈரான் தடை விதித்துள்ளதால் பல கப்பல்கள் அங்கு தேக்கமடைந்துள்ளன. இது ஆசிய நாடுகளில் கச்சா எண்ணெய் தட்டுப்பாட்டை ஏற்படுத்தும் என சர்வதேச நிபுணர்கள் எச்சரித்துள்ளனர்.இந்த நிலையில், ஈரான் படைகளின் பிரிகேடியர் ஜெனரல் சர்தார் இப்ராஹிம் ஜபாரி கூறுகையில், “ஹோர்முஸ் ஜலசந்தி மூடப்பட்டுவிட்டது. இப்போது யாராவது அதைக் கடக்க முயன்றால், புரட்சிகர காவல் படை மற்றும் ஈரான் கடற்படையின் வீரர்கள் அந்தக் கப்பல்களைத் தீக்கிரையாக்குவார்கள்” என்று திட்டவட்டமாகக் கூறினார்.
அதென்ன ஹோர்முஸ் ஜலசந்தி ?
ஹோர்முஸ் ஜலசந்தி அரேபிய தீபகற்பத்தில் ஈரான் மற்றும் ஓமன் இடையே அமைந்துள்ளது. இது பாரசீக வளைகுடாவை அரேபிய கடலுடன் இணைக்கிறது. ஹோர்முஸ் ஜலசந்தி வெறும் 2 மைல் அகலம் மட்டுமே கொண்ட மிகவும் குறுகிய கடல் வழிப்பாதை. உலகின் எண்ணெய் மற்றும் திரவமாக்கப்பட்ட இயற்கை எரிவாயுவில் சுமார் 20 சதவீதம் இவ்வழியாக கொண்டு செல்லப்படுகிறது. குறிப்பாக, சவூதி அரேபியா, ஈராக் மற்றும் ஈரான் உள்ளிட்ட முக்கிய மத்திய கிழக்கு நாடுகளில் இருந்து ஏற்றுமதி செய்யப்படும் எண்ணெய்க்கான முக்கிய போக்குவரத்து பாதையாக ஹோர்முஸ் ஜலசந்தி உள்ளது.கத்தார், ஐக்கிய அரபு எமிரேட்சில் இருந்து இயற்கை எரிவாயு உலக சந்தைகளில் நுழைவதற்கான ஒரே பாதையாக இது இருக்கிறது. இந்த பாதையை ஈரான் முடக்கி இருப்பதால் உலகளாவிய எரிசக்தி விநியோகம் தடைபட்டு, எரிபொருளுக்கு தட்டுப்பாடு ஏற்படும் அபாயமும் ஏற்பட்டுள்ளது.
