டெல்லி : யூடியூபில் 3 கோடி பின்தொடர்வோரை பெற்று பிரதமர் மோடி புதிய சாதனை படைத்துள்ளார். 2014ம் ஆண்டில் பிரதமராக மோடி பதவியேற்றது முதல், தனது பயணங்கள், உலகத் தலைவர்களுடனான சந்திப்புகள், அரசு விழாக்கள், வாழ்த்துகள் மற்றும் முக்கிய நிகழ்வுகளைப் யூடியூப், இன்ஸ்ட்டாகிராம் உள்ளிட்ட சமூக வலைத்தளங்களில் பகிர்ந்து வருகிறார். இந்நிலையில் யூடியூபில் அதிகம் பின்தொடர்வோரை கொண்ட தலைவர்கள் பட்டியலில், பிரதமர் மோடி முதலிடம் பிடித்துள்ளார். பிரதமர் மோடியின் பெயரிலான சேனல், 3 கோடி சந்தாதாரர்களுடன் முதலிடத்தில் உள்ளது. அடுத்த இடத்தில் இருக்கும் அமெரிக்க அதிபர் டிரம்ப் சேனலை, 40 லட்சம் பேர் பின்தொடர்கின்றனர்.
15 லட்சம் பேருடன் பிரேசில் அதிபர் லூலா டா சில்வா 3வது இடத்திலும் 4 லட்சம் பேருடன் உக்ரைன் அதிபர் ஜெலன்ஸ்கி 4ம் இடத்திலும் சால்வடோர் அரசியல்வாதி நயிப் புகேலே (5வது இடத்திலும் பிரான்ஸ் அதிபர் இமானுவேல் மேக்ரான் 6ம் இடத்திலும் இத்தாலி பிரதமர் ஜார்ஜியோ மெலோனி 7ம் இடத்திலும் உள்ளனர். ஏற்கனவே இன்ஸ்டாகிராம் தளத்திலும் 100 மில்லியன் (10 கோடி) பின்தொடர்பவர்களை கடந்த முதல் அரசியல்வாதி என்ற சாதனையை பிரதமர் மோடி பதிவு செய்துள்ளார். பிரதமர் மோடி, 2014ம் ஆண்டு இன்ஸ்டாகிராமில் இணைந்தார். அன்று முதல் தொடர்ந்து இன்ஸ்டாகிராம் செயலில் இருந்து வருகிறார். உலக நாடுகளின் தலைவர்களில் இவருக்கே அதிகமான (இன்ஸ்டாகிராம்) பின்தொடர்பவர்கள் இருப்பது குறிப்பிடத்தக்கது.
