சென்னை: மணிரத்னம் இயக்கத்தில், ஏ.ஆர்.ரஹ்மான் இசையில் கடந்த 1993 ஆம் ஆண்டு வெளியான ‘திருடா திருடா’ படத்தில் இடம்பெற்ற ‘கொஞ்சம் நிலவு…’ பாடலை பாடியவர் சந்திரலேகா அனுபமா. ஏ.ஆர்.ரஹ்மான் இசையமைப்பில் ‘ஜீன்ஸ்’ படத்தில் வந்த ‘நிசாரிசா’ பாடலை மறு உருவாக்கம் செய்து, அதை ஏ.ஆர்.ரஹ்மானுக்கு அன்பு பரிசாக வழங்கி உள்ளார். இதனை வீடியோவாகவும் உருவாக்கியிருக்கிறார்கள்.
இவர்களது இத்தகைய முயற்சியை அறிந்து பாராட்டு தெரிவித்துள்ள ஏ.ஆர்.ரஹ்மான், இந்த வீடியோ பாடலை சென்னையில் நடந்த இசை நிகழ்ச்சியில் வெளியிட்டார். இது குறித்து பாடகி சந்திரலேகா அனுபமா கூறுகையில், ‘‘எங்கள் சொந்த மெட்ராஸ் மொஸார்ட்டுக்கு பாராட்டு தெரிவிக்கும் விதமாக இந்தப் பாடலை மறு உருவாக்கம் செய்துள்ளோம். இந்த காதல் பாடலுக்கான ஆங்கில வரிகளை, இயக்குநர் ஷங்கரின் ‘ஜீன்ஸ்’ திரைப்படத்தில் இருந்து எடுத்திருக்கிறோம்.
தமிழ் வரிகளை எம்.எஸ்.பாலசுப்பிரமணியன் எழுதியிருக்கிறார். விகாஷ் நாகராஜ் இயக்கத்தில் அழகியல் காட்சிகளோடு உருவாகியிருக்கும் இந்த வீடியோ பாடலை நியூ மியூசிக் நிறுவனத்துடன் ஸ்கை 9 என்டர்டெயின்மென்ட் இணந்து தயாரித்துள்ளோம். தற்போது இசையமைப்பிலும், நடிப்பிலும் தீவிரம் காட்டி வருகிறேன். பல மேடை நாடகங்களில் நடித்து வருவதோடு, பல தனிப்பாடல்களுக்கு இசையமைத்து வருகிறேன்’’ என்றார்.
