மயிலாடுதுறை, டிச.10: மயிலாடுதுறையில் திருட்டு போன டிராக்டர் டிப்பரை பறிமுதல் செய்த குற்றப்பிரிவு போலீசார் இதில் தொடர்புடைய ஒருவரை கைது செய்தனர்.
மயிலாடுதுறை மாவட்டம் வழுவூர் கிராமத்தைச் சேர்ந்தவர் முருகன் (39). இவர் மயிலாடுதுறை ராஜேஸ்வரி நகரில் ஜல்லி மணல் விற்பனை மையம் வைத்துள்ளார். அங்கு நிறுத்தி வைக்கப்பட்டிருந்த டிராக்டரும் அதனுடனான ட்ரிப்பரும் கடந்த 28ம் தேதி அதிகாலை மாயமானது. இது குறித்து முருகன் மயிலாடுதுறை காவல்நிலையத்தில் புகார் செய்தார். அதன்பேரில் மாவட்ட எஸ்பி ஸ்டாலின் உத்தரவு பேரில் இன்ஸ்பெக்டர் சிவகுமார் தலைமையிலான குற்றப்பிரிவு போலீசார் வழக்கு பதிந்து விசாரணை மேற்கொண்டனர்.

தொடர்ந்து குற்றப்பிரிவு போலீசார் சிசிடிவி கேமரா பதிவுகளை கைப்பற்றி விசாரணை நடத்தியதில் இருவர் டிராக்டரை திருடி செல்வது தெரியவந்தது. இதனை அடுத்து குற்றப்பிரிவு போலீசார் தஞ்சாவூர் மாவட்டம் திருவிடைமருதூர் தாலுகா நரசிங்கம்பேட்டை பகுதியைச் சேர்ந்த வினோத் (38). என்பவரை பிடித்து விசாரணை நடத்தியதில் டிராக்டர், டிப்பர் திருடப்பட்டு திருச்சியில் அடகு வைக்கப்பட்டிருந்தது தெரிய வந்தது. இதையடுத்து வினோத்தை கைது செய்த போலீசார் திருச்சியில் இருந்த டிராக்டர் மற்றும் டிப்பரை பறிமுதல் செய்தனர். மேலும் போலீசார் சம்பவத்தில் தொடர்புடைய ஒருவரை தேடி வருகின்றனர்.

The post மயிலாடுதுறையில் டிராக்டர் திருடிய வாலிபர் கைது appeared first on Dinakaran.