புதுச்சேரி: புதுவையில் மாயமான மும்பை சிறுமியை கூட்டு பலாத்காரம் செய்ததாக சென்னையைச் சேர்ந்த 3 பேரை பிடித்து பெரியகடை போலீசார் விசாரித்து வருகின்றனர். புதுச்சேரியில் உறவினர் வீட்டுக்கு வந்த மும்பையை சேர்ந்த 16 வயது சிறுமி கடந்த மாதம் 30ம்தேதி மாயமானார். இதுகுறித்து அவருடைய பெற்றோர் பெரியகடை காவல் நிலையத்தில் புகார் அளித்தனர். போலீசார் வழக்குபதிந்து, அப்பகுதியில் இருந்த சிசிடிவி காட்சிகளை ஆய்வு செய்தனர். இதில் சிறுமி ஒரு ஆட்டோவில் ஏறிச்செல்வதை கண்டுபிடித்தனர். ஆட்டோ நம்பரை கொண்டு தமிழக பகுதியான கோட்டாகுப்பத்தை சேர்ந்த டிரைவர் மொய்தீன் (30), சிறுமியை ஓட்டலுக்கு அழைத்து சென்று பாலியல் பலாத்காரம் செய்ததோடு, தனது வீட்டுக்கு அழைத்து சென்றதும் தெரியவந்தது.
மனைவியிடம் சிறுவன் (கிராப் முடி வைத்திருந்ததால்) என அறிமுகப்படுத்தி, மது வாங்கிக்கொடுத்து 2 முறை பலாத்காரத்தில் ஈடுபட்டதும், பின்னர் போதையில் இருந்த சிறுமியை, 30ம்தேதி நள்ளிரவே புதுவை நகரப்பகுதியில் உள்ள ஒரு ரெஸ்டாரண்ட் வாசலில் இறக்கி விட்டு தலைமறைவானதும் தெரியவந்தது. இதையடுத்து போக்சோ சட்டத்தின்கீழ் வழக்கு பதிந்து மொய்தீனை போலீசார் கைது செய்தனர். இந்நிலையில் கடந்த 2ம்தேதி இரவு புதுச்சேரி கடற்கரையில் அச்சிறுமியை போலீசார் மீட்டு விசாரித்தனர். அப்போது சென்னையை சேர்ந்த 4 வாலிபர்கள் சிறுமியிடம் பேச்சு கொடுத்து, தனியாக அழைத்துச் சென்று மது வாங்கிக் கொடுத்து, கோட்டக்குப்பம் அருகிலுள்ள கடற்கரைக்கு அழைத்து சென்று ஓட்டல் அறையில் 31ம்தேதி அடைத்து வைத்து, பாலியல் பலாத்காரம் செய்ததும், பின்னர் சிறுமியை சென்னைக்கு அழைத்து சென்றதும், கடந்த 2ம்தேதி வாடகை கார் மூலம் சிறுமியை தனியாக புதுவைக்கு அனுப்பி வைத்ததும் தெரியவந்தது.
இதையடுத்து கோட்டக்குப்பம் கடற்கரை பகுதியில் ஓட்டலில் தங்கியிருந்தவர்களின் விவரங்களை தனிப்படையினர் சேகரித்தனர். அதன்படி சென்னையை சேர்ந்த 3 வாலிபர்களை தனிப்படையினர் பிடித்து, புதுவைக்கு அழைத்து வந்து விசாரணை நடத்தி வருவதாக தெரிகிறது. இந்நிலையில் பாதிக்கப்பட்ட சிறுமியை மருத்துவ பரிசோதனைக்காக ஜிப்மரில் போலீசார் அனுமதித்துள்ளனர். இந்த சம்பவம் அப்பகுதியில் பரபரப்பை ஏற்படுத்தியுள்ளது
The post புதுவையில் மும்பை சிறுமி கூட்டு பலாத்காரம்: சென்னை வாலிபர்கள் 3 பேர் சிக்கினர் appeared first on Dinakaran.
