நியூயார்க்: ஃபிபா உலக கோப்பை கால்பந்து போட்டித் தொடரின் பரபரப்பான பைனலில், நடப்பு சாம்பியன் அர்ஜென்டினாவை 1-0 என்ற கோல் கணக்கில் வீழ்த்திய ஸ்பெயின் அணி 2வது முறையாக சாம்பியனாகி சாதனை படைத்தது. அமெரிக்கா, மெக்சிகோ, கனடா நாடுகள் இணைந்து நடத்திய 23வது உலக கோப்பை தொடரின் இறுதிப் போட்டியில் நடப்பு சாம்பியன் அர் ஜென்டினா, ஐரோப்பிய சாம்பியன் ஸ்பெயின் அணிகள் மோதின.
உலகம் முழுவதும் கால்பந்து ரசிகர்கள் ஆவலுடன் எதிர்பார்த்த இப்போட்டி, நியூ ஜெர்சி மைதானத்தில் இந்திய நேரப்படி நேற்று முன்தினம் நள்ளிரவு தொடங்கி அதிகாலை வரை நடைபெற்றது. போட்டி தொடங்குவதற்கு முன்பாக சுமார் ஒன்றரை மணி நேரத்துக்கு வண்ணமயமான நிறைவு விழா நடைபெற்றது. அதில் பிரபல இசைக் கலைஞர் போஸ் மலோன் மற்றும் குழுவினர் பங்கேற்று ஆடிப்பாடி மகிழ்வித்தனர்.
இதைத் தொடர்ந்து, 2026 தொடரின் சாம்பியன் யார் என்பதை தீர்ம்மானிப்பதற்கான பைனல் பெரும் எதிர்பார்ப்புடன் தொடங்கியது. பந்தை கட்டுப்பாட்டில் வைப்பது, கடத்திச் செல்வது, தாக்குதல் நடத்துவது என அனைத்து வகையிலும் சற்று கூடுதல் உத்வேகத்துடன் செயல்பட்ட ஸ்பெயின் அணி அர்ஜென்டினாவுக்கு கடும் நெருக்கடி கொடுத்தது. மெஸ்ஸி & கோவும் அவ்வப்போது பதில் தாக்குதல் தொடுக்க களத்தில் அனல் பறந்தது.
எனினும், ஸ்பெயின் கோல் கீப்பர் உனய் சைமன் மற்றும் அர்ஜென்டினாவின் அனுபவ கீப்பர் எமிலியானோ மார்டினஸ் விழிப்புடன் செயல்பட்டு அனைத்து முயற்சிகளையும் முறியடித்தனர்.
இதனால் இடைவேளை வரை இரு அணிகளும் கோல் ஏதும் அடிக்காமல் சமநிலை வகித்தன. இரண்டாவது பாதியிலும் இதே நிலை நீடிக்க ஆட்டம் 30 நிமிட கூடுதல் நேரத்துக்கு சென்றது. 90’+3வது நிமிடத்தில் அர்ஜென்டினா வீரர் என்ஸோ பெர்னாண்டஸ் 2வது மஞ்சள் அட்டை பெற்றதால் தொடர்ந்து சிவப்பு அட்டை காட்டப்பட்டு வெளியேற்றப்பட்டார். இதனால் அந்த அணி 10 வீரர்களுடன் விளையாட வேண்டிய நெருக்கடி ஏற்பட்டது.
இதைப் பயன்படுத்தி கூடுதல் நேர ஆட்டத்தில் தாக்குதலை தீவிரப்படுத்திய ஸ்பெயின் அணிக்கு மாற்று வீரர் பெரான் டாரஸ் (106வது நிமிடம்) அபாரமாக கோல் அடித்து 1-0 என முன்னிலை கொடுத்தார். கடைசி கட்ட ஆட்டத்தில் பதில் கோல் அடிக்க அர்ஜென்டினா கடுமையாக முயற்சித்தும் உனய் சைமனை மீறி பந்தை வலைக்குள் திணிக்க முடியவில்லை. ஆட்ட நேர முடிவில் ஸ்பெயின் அணி 1-0 என்ற கோல் கணக்கில் நடப்பு சாம்பியன் ஆர்ஜென்டினாவை வீழ்த்தி 2வது முறையாக உலக கோப்பையை முத்தமிட்டது. முன்னதாக அந்த அணி 2010ல் சாம்பியன் பட்டம் வென்றிருந்தது.
ஸ்பெயின் அணியின் வெற்றியை அந்நாட்டு ரசிகர்கள் உற்சாகமாகக் கொண்டாடி வருகின்றனர். கோப்பையை வழங்கி கவுரவித்த அமெரிக்க அதிபர் டொனால்டு டிரம்ப், ஸ்பெயின் அணிக்கும் ஃபிபா அமைப்புக்கும் வாழ்த்துகளை தெரிவித்தார். சாம்பியன் பட்டம் வென்ற ஸ்பெயின் அணி உலக கோப்பையுடன் முதல் பரிசாக ரூ.480 கோடியை தட்டிச் சென்றதுடன், பிரத்யேகமாக தயாரிக்கப்பட்ட சிறப்பு மோதிரங்களும் அந்த அணி வீரர்களின் விரல்களை அலங்கரித்தன.அதே சமயம், கோப்பையை தக்கவைத்து 4வது முறையாக சாம்பியனாக வெண்டும் என்ற அர்ஜென்டினாவின் கனவு கலைந்தது. 2வது இடம் பிடித்த அர்ஜென்டினா அணிக்கு ரூ.315 கோடி வழங்கப்பட்டது.
* எம்பாப்பேவுக்கு கோல்டன் பூட்
2026 உலக கோப்பை தொடரில் அதிக கோல் அடித்த வீரருக்கான தங்க ஷூ விருதை, பிரான்ஸ் அணி கேப்டன் கிலியன் எம்பாப்பே தட்டிச் சென்றார். அவர் 10 கோல் மற்றும் 4 அசிஸ்ட் உடன் முதலிடம் பிடித்தார். அர்ஜென்டினா கேப்டன் மெஸ்ஸி 2வது இடமும் (8 கோல், 4 அசிஸ்ட்), இங்கிலாந்தின் ஜூட் பெல்லிங்காம் (7 கோல், 1 அசிஸ்ட்) 3வது இடமும் பிடித்தனர். எம்பாப்பே கூடுதலாக வெண்கலப் பந்து விருதும் பெற்றார்.
* தொடர் நாயகன் ரோட்ரி
அணியை சிறப்பாக வழிநடத்தியதுடன் நடுகள வீரராக அசத்திய ஸ்பெயின் அணி கேப்டன் ரோட்ரி, தொடரின் சிறந்த வீரருக்கான தங்கப் பந்து விருதை கைப்பற்றினார்.
* உனய் சைமனுக்கு கோல்டன் கிளவ்
சிறந்த கோல் கீப்பருக்கான தங்கக் கையுறை விருது ஸ்பெயின் அணியின் உனய் சைமனுக்கு வழங்கப்பட்டது. நடப்பு தொடரில் 8 போட்டியில் விளையாடிய அவர் ஒரே ஒரு கோல் மட்டுமே விட்டுக்கொடுத்தது குறிப்பிடத்தக்கது.சிறந்த இளம் வீரர் குபார்ஸி தொடரின் சிறந்த இளம் வீரராக ஸ்பெயினின் பாவ் குபார்ஸி தேர்வு செய்யப்பட்டார். நேர்மையான அணிக்கான ஃபேர்பிளே விருதை நெதர்லாந்து தட்டிச் சென்றது.
* அடிதடியில் இறங்கிய அர்ஜெண்டினா வீரர்கள் வலுக்கும் கண்டனம்
ஸ்பெயின் அணியுடனான உலக கோப்பை பைனலில் தோற்ற அர்ஜென்டினா வீரர்கள், களத்திலேயே எதிரணி வீரர்களை அடித்து உதைத்து கைகலப்பில் ஈடுபட்டனர். மேலும், பரிசளிப்பு நிகழ்ச்சியின்போதும் வெள்ளிப் பதக்கங்களை பெற்றுக் கொண்ட அர்ஜென்டினா வீரர்கள், ஸ்பெயின் வீரர்களுக்கு உலககோப்பையை வழங்கும் வரை காத்திருக்காமல் திரும்பிச் சென்றதும் சர்ச்சையை கிளப்பியுள்ளது. அர்ஜென்டினா வீரர்களின் அநாகரீக செயலுக்கு கால்பந்து பிரபலங்கள் பலரும் கடும் கண்டனங்களை தெரிவித்து வருகின்றனர்.
