நியூஜெர்சி: உலகக்கோப்பை கால்பந்துதொடரின் இறுதி போட்டியில் அர்ஜென்டினாவை 1-0 என்ற கோல் கணக்கில் ஸ்பெயின் அணி வெற்றிபெற்று 2வது முறையாக சாம்பியன் பட்டம் வென்றது. அந்த அணிக்கு ரூ.481 கோடி பரிசு தொகை வழங்கப்பட்டது. 23வது பிபா உலகக் கோப்பை கால்பந்து தொடரை அமெரிக்கா, மெக்சிகோ, கனடா ஆகிய நாடுகள் இணைந்து நடத்தின. மொத்தம் 48 அணிகள் பங்கேற்ற நிலையில் தலா 4 அணிகள் என பிரிக்கப்பட்டு லீக் சுற்று நடத்தப்பட்டது. தொடர்ந்து ரவுன்ட் ஆப் 32, ரவுன்ட் ஆப் 16 சுற்றும் நடத்தப்பட்டன. இந்த சுற்றுகள் முடிவில் கால்இறுதிக்கு ஸ்பெயின், பிரான்ஸ், பெல்ஜியம், மொராக்கோ, நார்வே, இங்கிலாந்து, அர்ஜென்டினா, சுவிட்சர்லாந்து ஆகிய அணிகள் தகுதிபெற்றது. கால்இறுதியில் பிரான்ஸ், ஸ்பெயின், இங்கிலாந்து, அர்ஜென்டினா ஆகிய அணிகள் அரையிறுதிக்குள் நுழைந்தன.அரையிறுதியில் ஸ்பெயின் 2-0 என பிரான்சையும், நடப்பு சாம்பியன் அர்ஜென்டினா 2-1 என இங்கிலாந்தையும் வென்றது.
இதையடுத்து சாம்பியன் பட்டம் யாருக்கு என்பதை தீர்மானிக்கும் இறுதி போட்டி அமெரிக்காவின் நியூஜெர்சி மெட்லைப் ஸ்டேடியத்தில் இந்திய நேரப்படி நேற்றிரவு 12.30 மணிக்கு தொடங்கியது. இதில் நடப்பு சாம்பியன் அர்ஜென்டினா- ஸ்பெயின் அணிகள் மோதின. 4வதுமுறையாக பட்டம் வெல்லும் முனைப்பில் அர்ஜென்டினாவும், 2வதுமுறையாக கோப்பையை முத்தமிடும் உத்வேகத்தில் ஸ்பெயினும் விறுவிறுப்பாக ஆடின. முதல் பாதியில் இரு அணியாலும் கோல் அடிக்க முடியவில்லை. தொடர்ந்து 2வது பாதியில் இரு அணிகளும் கோல் அடிக்க பல வாய்ப்புகளை உருவாக்கினாலும் பலன் கிடைக்கவில்லை.90 நிமிடங்களை கடந்து கூடுதல் நேரம் நோக்கி ஆட்டம் நகர்ந்தது. கூடுதல் நேரத்தில் (90+3) அர்ஜென்டினா நடுகள வீரர் என்சோ பெர்னாண்டஸ் போட்டி நேரத்தில் 2 முறை மஞ்சள் அட்டை பெற்றதால் சிவப்பு அட்டை காட்டப்பட்டு மைதானத்திலிருந்து வெளியேற்றப்பட்டார். இதனால் அந்த அணி 10 வீரர்களுடன் ஆடவேண்டிய நிலைக்கு தள்ளப்பட்டது. தொடர்ந்து ஆட்டம் கூடுதல் 30 நிமிடங்களுக்கு சென்றது. ஆட்டத்தின் 106வது நிமிடத்தில், ஸ்பெயின் மாற்று ஆட்டக்காரர் பெர்ரான் டோரஸ் , நிகோ வில்லியம்ஸின் அசிஸ்ட் மூலம் அதிரடியாக கோல் அடித்தார்.
எஞ்சிய நிமிடங்களில் அர்ஜென்டினா கடுமையாக போராடியும் கோல் அடிக்க முடியவில்லை. இதனால் ஸ்பெயினின் அந்த கோலே வெற்றிகோலாக அமைந்தது. 1-0 என்ற கோல் கணக்கில் ஸ்பெயின் வெற்றிபெற்று 2வதுமுறையாக சாம்பியன் பட்டம் வென்றது. ஸ்பெயின் அணியின் கேப்டன் ரோத்ரி, அமெரிக்க அதிபர் டிரம்ப் மற்றும் பிபா தலைவரிடமிருந்து உலகக் கோப்பையைப் பெற்றுக்கொண்டார். 2010ம் ஆண்டிற்கு தென்ஆப்ரிக்காவில் நடந்த உலக கோப்பை பைனலில் நெதர்லாந்தை வீழ்த்தி பட்டம் வென்ற ஸ்பெயின், சரியாக 16 ஆண்டுகள் கழித்து 2வது உலகக் கோப்பை சாம்பியன் பட்டத்தை வென்று வரலாற்று சாதனை படைத்துள்ளது. ஸ்பெயின் பட்டம் வென்றதை அந்நாட்டு ரசிகர்கள் உற்சாகமாக கொண்டாடி வருகின்றனர். அந்த அணிக்கு வாழ்த்துக்கள் குவிந்து வருகிறது.
தரவரிசையில் ஸ்பெயின் நம்பர் 1;
உலக கோப்பையை வென்ற ஸ்பெயின் பிபா உலக தரவரிசையில் அர்ஜென்டினாவை பின்னுக்கு தள்ளி முதலிடத்திற்கு முன்னேறியது. அர்ஜென்டினா 2, பிரான்ஸ் 3, இங்கிலாந்து 4, பிரேசில் 5,வது இடத்தில்உள்ளது. மொராக்கோ, போர்ச்சுக்கல் பெல்ஜியம், நெர்லாந்து, மெக்சிகோ முறையே 5 முதல் 10 இடத்தில் உள்ளன.
ரூ.482 கோடி பரிசுத்தொகை;
சாம்பியன் பட்டம் வென்ற ஸ்பெயின் அணிக்கு கோப்பையுடன் ரூ.482 கோடி பரிசுத்தொகை வழங்கப்பட்டது.ரன்னர் அர்ஜென்டினா அணிக்கு 317 கோடி ரூபாய் கிடைத்தது. 3வது இடம் பிடித்த இங்கிலாந்துக்கு ரூ.279 கோடி, 4வது இடம் பிடித்த பிரான்சுக்கு ரூ.259கோடி வழங்கப்பட்டது. கால்இறுதியுடன் வெளியேறிய 4 அணிகளுக்கு தலா ரூ.182 கோடி, ரவுன்ட் ஆப் சுற்றுவரை முன்னேறிய அணிகளுக்கு தலா ரூ.144 கோடி,ரவுன்ட் ஆப் 32 சுற்றுக்குள் வந்த அணிகளுக்கு தலா ரூ.105, குரூப் சுற்றுடன் வெளியேறிய 16 அணிகளுக்கு தலா 86 கோடி ரூபாய் வழங்கப்பட்டது. இவை தவிர 48 அணிகளுக்கும் பயணச் செலவு மற்றும் பயிற்சி முகாம்களுக்கான தயாரிப்பு நிதியாக தலா ரூ.14.5 கோடி தனியாக வழங்கப்பட்டது.
ஒரே நேரத்தில் 2 உலகக்கோப்பை;
ஆண்கள் மற்றும் பெண்கள் ஆகிய இரு பிரிவுகளிலும் ஒரே நேரத்தில் உலகக் கோப்பை சாம்பியனாகத் திகழும் முதல் நாடு என்ற பெருமையை ஸ்பெயின் பெற்றுள்ளது.
கண்ணீருடன் விடைபெற்ற மெஸ்சி;
39 வயதான கால்பந்து உலகின் ஜாம்பவான் அர்ஜென்டினா கேப்டன் லியோனல் மெஸ்சிக்கு இது கடைசி உலகக் கோப்பை ஆட்டமாகும். நடப்பு சாம்பியனான அர்ஜென்டினாவை மீண்டும் ஜெயிக்க வைக்க அவர் போராடியும், கோப்பை இல்லாமல் கண்ணீருடன் விடைபெற்றது ரசிகர்களுக்குப் பெருத்த ஏமாற்றத்தை அளித்தது. ஸ்பெயினின் பலத்த தடுப்பாட்டத்தால் அர்ஜென்டினாவால் ஒரு கோல் கூட அடிக்க முடியாமல் போனது.
