புதுடெல்லி: பருவநிலை மாற்றத்தால் ஏற்படும் தூக்க இழப்பில் இந்தியாவில் தமிழ்நாடு நம்பர்-1 இடத்தை பிடித்துள்ளது. இரவு நேர வெப்பம் காரணமாக ஆண்டுக்கு 84 மணி நேர தூக்கத்தை தமிழ்நாட்டு மக்கள் இழப்பதாக ஆய்வுகள் தெரிவிக்கின்றன. புவி வெப்பமயமாவதால் ஏற்படும் தூக்க இழப்புக்கு ஆளாகும் உலகின் முக்கிய பகுதிகளில் இந்தியாவும் ஒன்று என கிளைமேட் சென்ட்ரல் அமைப்பின் புதிய ஆய்வறிக்கை தெரிவிக்கிறது.
உலகளாவில் 2020 முதல் 2025 வரையிலான காலகட்டத்தில் இரவு நேர வெப்பம் காரணமாக சராசரியாக ஒருநபர் ஆண்டுக்கு சுமார் 56 மணி நேர தூக்கத்தை இழந்துள்ளார். இது ஆண்டுதோறும் 7 இரவுகளுக்கான தூக்க இழப்புக்கு சமம். இதில் ஒரு இரவுக்கான இழப்பு பருவநிலை மாற்றத்துடன் தொடர்புடையது என்கிறது அந்த அறிக்கை. குறிப்பாக, பருவ நிலை மாற்றத்துடன் தொடர்புடைய தூக்க இழப்புகள் இந்தியாவில் அதிகரித்து வருவதாக கூறப்பட்டுள்ளது.
இந்தியாவில் 107 நகரங்களில் இந்த ஆய்வு மேற்கொள்ளப்பட்டதில், பருவநிலை மாற்றத்தால் ஏற்படும் தூக்க இழப்பு ஏற்படும் தமிழ்நாட்டில் மிக அதிகமாக பதிவாகி உள்ளது. தென் மாநிலங்களில் இந்த பாதிப்பு அதிகமாக உள்ளதாக ஆய்வில் கூறப்பட்டுள்ளது. தமிழக மக்கள் ஆண்டுக்கு 84 மணி நேர தூக்கத்தை இழக்கின்றனர். இதில் இரவு நேர வெப்பத்தால் சராசரியாக ஒருநபர் ஆண்டுக்கு 7.9 மணி நேர தூக்கத்தை இழக்கிறார்.
பெருநகரங்களில் சென்னை 93 மணி நேரம், மும்பை 84 மணி நேரம், கொல்கத்தா 80 மணிநேரமாக அதிகபட்ச ஒட்டுமொத்த தூக்க இழப்பை பதிவு செய்துள்ளன. இதில் பெங்களூரு பருவநிலை மாற்றத்தால் ஏற்படும் தூக்க இழப்பில் (ஆண்டுக்கு 8 மணி நேரம்) முக்கிய பங்கு வகிக்கிறது. மகாராஷ்டிராவில், சராசரி ஆண்டு தூக்க இழப்பு 76.3 மணிநேரமாகவும், அதில் 5.8 மணிநேர இழப்பு காலநிலை மாற்றத்துடன் தொடர்புடையதாகவும் உள்ளது. இதன் மூலம் இரவு நேர வெப்பம் அதிகரிப்பது பொது சுகாதார அச்சுறுத்தலாக உருவெடுத்து வருகிறது.
* தூக்கமின்மையால் ஏற்படும் பாதிப்பு
சிறந்த ஆரோக்கியத்திற்கு பெரியவர்கள் 7 முதல் 9 மணி நேரம் வரை தூங்க வேண்டியது அவசியம். இல்லாவிட்டால், நோய் எதிர்ப்பு சக்தி மற்றும் செயல்பாட்டுத் திறன் பாதிப்பதோடு, தவறுகள், உடல் வலி மற்றும் விபத்துகள் அதிகரிப்பதற்கும் வழிவகுக்கிறது. போதிய தூக்கமின்மை தொடர்ந்து நீடித்தால், அது உடல் எடை அதிகரிப்பு, நீரிழிவு நோய், உயர் ரத்த அழுத்தம், இதய நோய்கள் மற்றும் இறப்பு அபாயம் அதிகரிப்பு ஆகிய பாதிப்புகளை ஏற்படுத்தக் கூடும்.
