லாலாப்பேட்டை, ஜூன். 13: லாலாபேட்டை பகுதிகளில் 20-க்கு மேற்பட்ட கடைகளில் குட்கா பொருட்கள் விற்பனை செய்யப்படுகிறதா என போலீசார் திடீர் சோதனை நடத்தினர். லாலாபேட்டை கடைவீதி, சந்தைப்பேட்டை, கொடிக்கால் தெரு ஆகிய பகுதியில் 20க்கும் மேற்பட்ட பெட்டி கடைகள் மற்றும் மளிகை கடைகளில் நேற்று ஆய்வு நடைபெற்றது. லாலாப்பேட்டை காவல் ஆய்வாளர் சுரேஷ் மற்றும் உதவி ஆய்வாளர் நரேஷ் தலைமையிலான போலீசார் திடீர் ஆய்வு மேற்கொண்டனர்.
இளைஞர்கள் மற்றும் பள்ளி மாணவர்களுக்கு குட்கா, ஹான்ஸ் போன்ற புகையிலைப் பொருட்களை விற்பதை தடுக்கும் பொருட்டும், சட்ட விரோதமாக குட்கா, ஹான்ஸ் போன்ற புகையிலைப் பொருட்கள் விற்பதை தடுப்பதற்காக இந்த திடீர் சோதனை நடைபெற்றதாக போலீசார் தெரிவித்தனர். கடைகளில் குக்கா ஹான்ஸ் போன்ற புகையிலை பொருட்கள் விற்பனை செய்தால் கடும் நடவடிக்கை எடுக்கப்படுமென போலீசார் தெரிவித்தனர்.
