கும்பகோணம்: கும்பகோணம் அரசு பள்ளியில் காலை உணவு திட்டத்தை தவெக நிர்வாகிகள் ஆய்வு செய்த சம்பவம் சர்ச்சையை ஏற்படுத்தி உள்ளது. இதற்கு சமூக ஆர்வலர்கள் கண்டனம் தெரிவித்துள்ளனர். தமிழக முதல்வராக தவெக தலைவர் விஜய் கடந்த 10ம் தேதி பதவி ஏற்றார். அன்று முதல் கோயில்கள், அரசு மருத்துவமனைகள், அரசு அலுவலகங்களில் தவெக நிர்வாகிகள் ஆய்வு செய்து அலப்பறை ஏற்படுத்தினர். இது பெரும் சர்ச்சையை ஏற்படுத்தியது. அமைச்சர்கள், எம்எல்ஏக்கள் தவிர கட்சி நிர்வாகிகள் அரசு அலுவலகங்களில் ஆய்வில் ஈடுபடக்கூடாது என்று கட்சியின் பொது செயலாளர் புஸ்ஸி ஆனந்த் உத்தரவு பிறப்பித்தார். ஆனாலும் இந்த உத்தரவை தவெக நிர்வாகிகள் கண்டுகொள்வதாக தெரியவில்லை.
தொடர்ந்து ஆய்வில் ஈடுபட்டு வருகின்றனர். நேற்று தஞ்சை மாவட்டம் கும்பகோணம் அரசு பள்ளியில் காலை உணவு திட்டத்தை தவெக நிர்வாகிகள் ஆய்வு செய்த போட்டோ, சமூக வலைதளங்களில் வைரலாகி வருகிறது. தஞ்சை மாவட்டம் கும்பகோணம் மாநகராட்சிக்கு உட்பட்ட பாணாதுறை மாநகராட்சி தொடக்கப்பள்ளியில் மாணவர்களுக்கு காலை உணவு வழங்கப்பட்டது. அப்போது அந்த பள்ளிக்கு தஞ்சை கிழக்கு மாவட்ட தவெக பொருளாளர் விஜய் சந்திரன், மாநகர செயலாளர் முருகானந்தம் ஆகியோர் வந்தனர். பின்னர் பள்ளி மாணவர்களுக்கு காலை உணவு திட்டம் முறையாக வழங்கப்படுகிறதா என்று பார்வையிட்டனர். மேலும் மாணவர்களுக்கு என்னென்ன உணவு வழங்கப்படுகிறது, குறிப்பிட்ட நேரத்துக்கு முறையாக உணவு வழங்கப்படுகிறதா என்று பணியாளர்களிடம் கேட்டறிந்தனர்.
இதைதொடர்ந்து பள்ளியில் காலை உணவு திட்டத்தில் மாணவர்கள் சாப்பிடுவதை ஆய்வு செய்தனர். பின்னர் ஆய்வு செய்த புகைப்படங்களை தனது சமூக வலைதளத்தில் தவெக மாவட்ட பொருளாளர் விஜய்சந்திரன் பதிவிட்டார். தற்போது இந்த புகைப்படங்கள் சமூக வலைதளங்களில் வைரலாகி வருகிறது. இதற்கு சமூக ஆர்வலர்கள் கண்டனம் தெரிவித்துள்ளனர். அவர்கள் கூறுகையில், அரசு அலுவலகங்கள், பள்ளிகளில் முதல்வர், அமைச்சர்கள், அதிகாரிகள் தான் ஆய்வு செய்ய வேண்டும். ஆனால் கடந்த ஒரு மாதமாக அரசு பொறுப்பில் இல்லாத தவெக மாவட்ட செயலாளர்கள், நிர்வாகிகள் சிலர் அரசு மருத்துவமனை, அரசு அலுவலகம், பள்ளிகளில் ஆய்வு செய்து வருகின்றனர். இதை முதல்வர் விஜய் வேடிக்கை மட்டுமே பார்க்கிறார். இது கண்டனத்துக்குரியது என்றனர்.
