அகில இந்திய காங்கிரஸ் கமிட்டியின் முக்கியத் தலைவர்களில் ஒருவரும், மக்களவை எதிர்க்கட்சி தலைவருமான ராகுல்காந்தி, இன்று (20ம் தேதி) தென் மாவட்டங்களில் சுற்றுப்பயணம் மேற்கொண்டு மதசார்பற்ற முற்போக்கு கூட்டணி வேட்பாளர்களை ஆதரித்து பிரசாரம் செய்கிறார். டெல்லியில் இருந்து விமானம் மூலம் காலை 10.45 மணிக்கு திருவனந்தபுரம் வரும் அவர் அங்கு இருந்து ஹெலிகாப்டர் மூலம் மண்டைக்காடு அருகே கருமன்கூடல் தனியார் பள்ளி மைதானம் வந்து சேருகிறார்.

அங்கிருந்து கார் மூலம் 11.30 மணிக்கு மண்டைக்காடு அருகே லட்சுமிபுரம் கலை அறிவியல் கல்லூரி மைதானம் வரும் அவர், அங்கு நடைபெறும் தேர்தல் பிரசார பொதுக்கூட்டத்தில் பேசுகிறார். பிரசாரத்தை முடித்துக்கொண்டு பகல் 12.50 மணிக்கு நெல்லை மாவட்டம் நாங்குநேரி செல்கிறார். பிற்பகல் 2.25 மணிக்கு ஸ்ரீவைகுண்டம் செல்லும் அவர் அங்கு மதசார்பற்ற முற்போக்கு கூட்டணி வேட்பாளர்களை ஆதரித்து பொதுக்கூட்டத்தில் பேசுகிறார். பகல் 3.35 மணிக்கு தூத்துக்குடி விமான நிலையம் செல்லும் அவர் அங்கிருந்து சிறப்பு விமானத்தில் இரவு 7.20 மணிக்கு டெல்லி புறப்பட்டு செல்கிறார்.