திருச்சி மேற்கு சட்டமன்ற தொகுதி தவெக வேட்பாளர் ராமமூர்த்தி, தொகுதி முழுவதும் தீவிர பிரசாரத்தில் ஈடுபட்டு வருகிறார். பிரசாரத்துக்காக தவெக சார்பில் வாட்ஸ்அப் குழு ஒன்று அமைக்கப்பட்டது. அந்த குழுவிலிருந்து வேட்பாளர் ராமமூர்த்தியை குழுவின் அட்மின் (தவெக முக்கிய நிர்வாகி செந்தில்) திடீரென நீக்கினார். வேட்பாளர் நீக்கப்பட்ட பின்னர் அந்த குழுவில், அட்மின் சார்பில் வெளியிடப்பட்ட ஆடியோவில், வேட்பாளர் ராமமூர்த்திக்கு ஆதரவாக தொகுதியில் யாரும் ‘கேன்வாசிங்’ பண்ண வேண்டாம். பிரசாரத்தை முற்றிலும் நிறுத்த வேண்டும்.

இது தலைமையிலிருந்து வந்துள்ள உத்தரவு. பூத் ஏஜென்டுகளும் வேட்பாளருக்கு ஆதரவாக செல்லக்கூடாது என கூறப்பட்டிருந்தது. இந்த ஆடியோ கடந்த 16ம்தேதி வெளியாகி பரபரப்பை ஏற்படுத்தியது. இந்த ஆடியோ விவகாரம் திருச்சி மேற்கு தொகுதியில் ஏற்படுத்திய பரபரப்பு அடங்குவதற்குள், மற்றொரு ஆடியோ தற்போது வெளியாகி தவெகவினர் மத்தியில் அதிர்வலையை ஏற்படுத்தி உள்ளது.

தவெக மாவட்ட இணை செயலாளர் ஆனந்த், கிராப்பட்டி பகுதி இளைஞரணி ஆண்ட்ரூஸ் பேசிக்கொள்ளும் அந்த ஆடியோவில், எலெக்‌ஷன் நேரத்தில் இந்த முரண்பாடு எதற்கு பிரதர். தலைவரிடம் பேசு… இல்லையென்றால் ஏதாவது பொறுப்பாளரிடம் பேசு…. என்று கூறிக்கொண்டிருந்த போதே, மறுமுனையில் இருந்து பேசியவர் இடைமறித்து… ‘அவர் விலைக்கு போய் விட்டார் பிரதர். அன்புமணியிடம் டீலிங் பேசிக்கொண்டிருக்கிறார்’ என்று கூறுவதை கேட்டு போன் செய்தவர் கடும் அதிர்ச்சி அடைகிறார். அதோடு அந்த ஆடியோ உரையாடல் முடிவடைகிறது.