தமிழக பாஜ முன்னாள் மாநில தலைவர் அண்ணாமலை சட்டமன்ற தேர்தலில் போட்டியிடவில்லை. கோவையில் அவர் கேட்ட தொகுதி ஒதுக்கப்படாத காரணத்தால் கடும் அப்செட்டில் இருக்கிறார். ஆனாலும், மனக்கஷ்டத்தை வெளியே காட்டிக்கொள்ளக்கூடாது என்பதில் உறுதியாக இருக்கிறார். அப்படி காட்டிக்கொண்டால், கட்சியிலும், மக்கள் மத்தியிலும் தனது இமேஜ் பாதிக்கப்படும் என்பதில் அவர் தெளிவாக இருக்கிறார். அதனால், ‘‘இத்தேர்தலில் போட்டியிடும் பா.ஜ நண்பர்களுக்கு எனது வாழ்த்துகள், அனைவருக்கும் நான் தேர்தல் பிரசாரம் செய்வேன்’’ என பதிவு வெளியிட்டார்.

அதன்படி, கோவை வடக்கு தொகுதி பாஜ வேட்பாளர் வானதி சீனிவாசன் நேற்று முன்தினம் வேட்புமனு தாக்கல் செய்ய சென்றபோது, அண்ணாமலையும் உடன் சென்றார். இதேபோல், தொண்டாமுத்தூர் தொகுதி அதிமுக வேட்பாளர் எஸ்.பி.வேலுமணி பேரூர் தாசில்தார் அலுவலகத்தில் வேட்புமனு தாக்கல் செய்தபோதும் உடன் சென்றார்.

அப்போது அலுவலக வளாகத்தில் 100 மீட்டருக்கு முன்பாக அண்ணாமலையின் கார் தடுத்து நிறுத்தப்பட்டது. அப்போது அங்கிருந்து பரபரப்பாக வேகமாக நடந்து வந்த அண்ணாமலை, உடனடியாக அருகில் சாலையோரம் நின்று வேடிக்கை பார்த்தவரின் பைக்கில் ஏற முயன்றார். அப்போது அந்த நபர், ‘‘நான் அங்க போகல அண்ணா…’’ என்று தெரிவிக்க, ‘‘ஓகே… நீங்க அங்க போகலையா..? நோ பிராப்ளம்…’’ என்று சமாளித்தபடி, அருகில் நின்ற மற்றொருவரின் பைக்கில் ஏறி பயணித்தார். அண்ணாமலை இப்படி ‘நோஸ்கட்’ வாங்கிய வீடியோ, சமூக வலைதளங்களில் வைரலாகி வருகிறது. பலர், ஆயிரம் கோடி அதிபதிக்கே இந்த நிலையா? என கமெண்ட்டில் கலாய்த்து வருகின்றனர்.