சென்னை: காங்கிரஸ் வெளியிட்டுள்ள நட்சத்திர பேச்சாளர் பட்டியலில் ராகுல், பிரியங்கா காந்தி உள்ளிட்ட 40 பேர் இடம்பெற்றுள்ளனர். தமிழ்நாட்டில் சட்டமன்ற தேர்தலுக்கான வேட்பு மனு தாக்கல் முடிந்து வேட்பு மனுக்களின் பரிசீலனையும் முடிவடைந்தது. ஒவ்வொரு தொகுதிகளிலும் எத்தனை வேட்பாளர்கள் போட்டியிடுகிறார்கள் என்பதையும் தேர்தல் ஆணையம் அறிவித்துவிட்டது. இதை தொடர்ந்து அனைத்து கட்சிகளின் தேர்தல் பிரசாரம் அனல் பறக்கிறது. தேர்தல் பிரசாரங்களில் அந்தந்த கட்சிகளின் நட்சத்திர பேச்சாளர்கள் யார் யார் என்பதை ஒவ்வொரு கட்சியும் அறிவிக்கும்படி தேர்தல் கமிஷன் கேட்டுக் கொண்டுள்ளது.

ஏனென்றால், அறிவிக்கப்பட்ட நட்சத்திர பேச்சாளருக்கான போக்குவரத்து உள்ளிட்ட தேர்தல் பிரசார செலவுகள், அவர் எந்த வேட்பாளருக்காக பிரசாரம் செய்கிறாரோ, அவரது தேர்தல் செலவுக் கணக்கில் சேராது. அந்த வகையில் அங்கீகரிக்கப்பட்ட கட்சிகள் 40 நட்சத்திர பேச்சாளர்களின் பெயரையும், அங்கீகரிக்கப்பட்டாத கட்சிகள் 20 நட்சத்திர பேச்சாளர்களின் பெயரையும் தேர்தல் கமிஷனிடம் கொடுத்துவிட வேண்டும். 234 சட்டமன்ற தொகுதிகளை கொண்ட தமிழ்நாட்டில் வரும் 23ம்தேதி வாக்குப்பதிவு நடைபெற உள்ளது. தேர்தலை முன்னிட்டு வேட்பாளர்கள் வீதி வீதியாக சென்று தீவிர வாக்கு வேட்டையில் ஈடுபட்டு வருகின்றனர். அவர்களை ஆதரித்து அந்தந்த கட்சி தலைவர்களும், முக்கிய நிர்வாகிகளும் சூறாவளி பிரசாரத்தில் ஈடுபட்டு வருகின்றனர். திமுக கூட்டணியில் இடம்பெற்றுள்ள காங்கிரஸ் கட்சி 28 இடங்களில் போட்டியிடுகிறது.

இந்நிலையில் தமிழ்நாடு சட்டமன்றத் தேர்தலுக்கான காங்கிரஸ் கட்சியின் நட்சத்திர பேச்சாளர்கள் பட்டியல் வெளியிடப்பட்டுள்ளது. அதில் 40 நட்சத்திர பேச்சாளர்களின் பெயர்கள் இடம்பெற்றுள்ளன. இந்த பட்டியலில், அகில இந்திய காங்கிரஸ் தலைவர் மல்லிகார்ஜுன கார்கே, ராகுல் காந்தி, கே.சி.வேணுகோபால், பிரியங்கா காந்தி, ப.சிதம்பரம், கிரிஷ் சோடங்கர், சித்தராமையா, ரேவந்த் ரெட்டி, டி.கே.சிவக்குமார், முகுல் வாஸ்னிக், சச்சின் பைலட், ரமேஷ் சென்னிதலா, சசி தரூர், சையத் நசீர் ஹுசைன், உத்தம் குமார் ரெட்டி, மாணிக்கம் தாகூர், காஜி முகமது நிசாமுதீன், செல்வப்பெருந்தகை, ராஜேஷ் குமார், மல்லு பாட்டி விக்ரமார்கா, வி.நாராயணசாமி, ஜி.பரமேஸ்வரா, இம்ரான் பிரதாப்கர்ஹி, கார்த்தி சிதம்பரம், எம்.கே.விஷ்ணு பிரசாத், பி.கோபிநாத், ஜோதிமணி, விஜய் வசந்த், ஆர். சுதா, சசிகாந்த் செந்தில், ராபர்ட் புரூஸ், வி.டி.சதீசன், கே.ஜெயகுமார், திருநாவுக்கரசர், கே.வி.தங்கபாலு, கே.எஸ்.அழகிரி, நிவேதித் ஆல்வா, ரோஹித் சவுதரி, உதய் பானு சிப், அல்கா லம்பா என 40 பேர் இடம்பெற்றுள்ளனர்.

இந்த பட்டியலில் ராகுல்காந்தி, பிரியங்கா காந்தி, மல்லிகார்ஜூன கார்கே உள்ளிட்ட மேலிட தலைவகள் இடம்பெற்றுள்ளதால், விரைவில் தமிழ்நாட்டில் திமுக கூட்டணி வேட்பாளர்களை ஆதரித்து பிரசாரம் செய்ய வருவது உறுதியாகியுள்ளது. பிரசார பொதுக்கூட்டத்துக்கான ஏற்பாடுகளை தமிழக காங்கிரஸ் தலைமை செய்து வருகிறது.