புதுடெல்லி: அமெரிக்க கல்வி நிறுவனங்களில் சேரும் இந்திய மாணவர்களின் எண்ணிக்கை 6.9 சதவீதமாக குறைந்துள்ளது என ஒன்றிய அரசு தெரிவித்துள்ளது. மாநிலங்களவையில் நேற்று அமெரிக்காவில் இந்திய மாணவர்களின் சேர்க்கை குறைந்துள்ளதா என கேள்வி எழுப்பப்பட்டது. இந்த கேள்விக்கு ஒன்றிய வௌியுறவுத்துறை இணையமைச்சர் கீர்த்தி வர்தன் சிங் அளித்த பதிலில், “பிப்ரவரி 2026 நிலவரப்படி, 3.5 லட்சத்துக்கும் அதிகமான இந்திய மாணவர்கள் அமெரிக்காவில் ஆரம்ப பள்ளி முதல் பல்கலைக்கழக படிப்புகள் வரை பல்வேறு கல்வி திட்டங்களில் தொடர்கின்றனர்.
இது கடந்த 2025ம் ஆண்டு பிப்ரவரியில் 3,78,787ஆக இருந்தது. இது நடப்பாண்டு பிப்ரவரியில் 3,52,644ஆக குறைந்துள்ளது. அமெரிக்க கல்வி நிறுவனங்களில் ஒட்டுமொத்த மாணவர் சேர்க்கையில் 6.9 சதவீதம் குறைந்துள்ளதை இந்த எண்ணிக்கை சுட்டிக்காட்டுகிறது. அமெரிக்காவுக்கு விசா கிடைப்பதில் தாமதம், கடுமையான விசா சோதனைகள் மற்றும் விசா ரத்து செய்யப்படுவது போன்றவை இதற்கு முக்கிய காரணங்களாகும். மாணவர்களின் விசா உள்ளிட்ட பிரச்னைகளை தீர்ப்பதற்காக அமெரிக்க அதிகாரிகளிடம் ஒன்றிய அரசு தொடர்ந்து பேசி வருகிறது” என தெரிவிக்கப்பட்டுள்ளது.
