மேட்டுப்பாளையம் : தமிழகத்தில் சட்டமன்ற தேர்தல் வரும் ஏப்.23ம் தேதி ஒரே கட்டமாக நடைபெற உள்ளது.தேர்தல் அறிவிக்கப்பட்ட நாள் முதல் நடத்தை விதிமுறைகள் அமலில் உள்ளன.மேட்டுப்பாளையம் சட்டமன்ற தொகுதிக்குட்பட்ட பல்வேறு பகுதிகளில் நேற்று ஒரே நாளில் 8 பேரிடமிருந்து உரிய ஆவணங்கள் இன்றி எடுத்து வரப்பட்ட ரூ.8,98,200 ரொக்கம் பறிமுதல் செய்யப்பட்டு வட்டாட்சியர் அலுவலகத்தில் ஒப்படைக்கப்பட்டது.
அதன்படி நேற்று நிலை கண்காணிப்பு குழு-2 சிறுமுகையை அடுத்த சின்னக்கள்ளிப்பட்டி சோதனைச்சாவடியில் வாகன சோதனை மேற்கொண்ட போது கர்நாடக மாநிலம் மாண்டியா ஸ்ரீரங்கப்பட்டினம் பகுதியை சேர்ந்த கோவிந்த கவுடா(67) என்பவரின் காரில் இருந்து ரூ.2.50 லட்சம், அதே மாநிலத்தை சேர்ந்த குண்டல்பேட் பகுதியை சேர்ந்த மாதப்பா(26) என்பவரின் லோடு வாகனத்தில் உரிய ஆவணங்கள் இன்றி எடுத்து வரப்பட்ட ரூ.76,200, கர்நாடக மாநிலம் குண்டல்பேட் ஹங்கல்லி பகுதியை சேர்ந்த ராமே கவுடா(38) என்பவரின் காரில் இருந்து ரூ.1.05 லட்சம் ரொக்கம்,
அதே மாநிலம் குண்டல்பேட் பேரம்பாடி பகுதியை சேர்ந்த மணிகண்டா(30) என்பவரின் காரில் இருந்து ரூ.80 ஆயிரம், பறக்கும் படையினரின் வாகன சோதனையில் சின்னக்கள்ளிப்பட்டி சோதனை சாவடி அருகில் கர்நாடகா மாநிலம் அரபிகேரா தொட்டடே மேனே பகுதியை சேர்ந்த பழனிச்சாமி(50) என்பவரின் காரில் இருந்து ரூ.1,73,500, கர்நாடக மாநிலம் சாம்ராஜ்நகர் கொள்ளேகால் பகுதியை சேர்ந்த ஹிருதயராஜ்(45) என்பவரின் காரில் இருந்து ரூ.86,000, கர்நாடகா மாநிலம் சாம்ராஜ் நகர் கொள்ளேகால் பகுதியை சேர்ந்த நாகராஜு(40) என்பவரின் காரில் இருந்து ரூ.60 ஆயிரம், நிலை கண்காணிப்பு குழு-4 மேட்டுப்பாளையத்தில் இருந்து கோவை செல்லும் வழியில் பெரியமத்தம்பாளையம் அருகே வாகன சோதனையில் ஈடுபட்ட போது கேரள மாநிலம் பாலக்காடு கூடலூர் பகுதியை சேர்ந்த கிருஷ்ணாத்மஜன்(52) என்பவரின் காரிலிருந்து ரூ.67,500 என மொத்தமாக 8 பேரிடமிருந்து ஒரே நாளில் ரூ.8,98,200 ரொக்கம் பறிமுதல் செய்யப்பட்டது.
பறிமுதல் செய்த பணத்தை பறக்கும் படையினர் மற்றும் நிலை கண்காணிப்பு குழுவினர் வட்டாட்சியர் அலுவலகத்தில் தேர்தல் பிரிவு தனித்துணை வட்டாட்சியர் பாலமுருகன்,தலைமையிடத்து துணை வட்டாட்சியர் சங்கர்லால் ஆகியோரிடம் ஒப்படைத்தனர்.
