உலக கோப்பை ஹாக்கி; ஒரே பிரிவில் இந்தியா-பாகிஸ்தான்: ஆக.20ம் தேதி மோதல்

லாசேன்: 16வது உலகக் கோப்பை ஹாக்கி போட்டி, நெதர்லாந்து மற்றும் பெல்ஜியத்தில் ஆகஸ்ட் 15 முதல் 30 வரை நடைபெறவுள்ளது. மொத்தம் 16 அணிகள் இதில் பங்கேற்கின்றன. இந்த அணிகளுக்கான குரூப் தற்போது இறுதி செய்யப்பட்டுள்ளது. இதன்படி, இந்தியா குரூப் ‘டி’-ல், இங்கிலாந்து, பாகிஸ்தான், வேல்ஸ் அணிகளுடன் சோ்க்கப்பட்டுள்ளது. இந்தியா தனது ஆட்டங்களில், முதலில் வேல்ஸ் அணியுடன் ஆகஸ்ட் 16ம் தேதியும், இங்கிலாந்துக்கு எதிராக ஆகஸ்ட் 18ம் தேதியும், கடைசியாக பாகிஸ்தானுடன் ஆகஸ்ட் 20ம்தேதியும் மோதுகிறது.

குரூப் ‘டி’ ஆட்டங்கள் அனைத்துமே நெதர்லாந்தில் நடைபெறவுள்ளன. மகளிருக்கான 16வது உலகக் கோப்பை ஹாக்கி போட்டியும், ஆடவர் போட்டிக்கு இணையாக அதே தேதி மற்றும் அதே இடங்களில் நடைபெறவுள்ளது. இந்திய மகளிர் அணியும் குரூப் ‘டி’ல் சேர்க்கப்பட்டுள்ளது. இதில் சீனாவுக்கு எதிராக ஆகஸ்ட் 16, தென் ஆப்ரிக்காவுக்கு எதிராக ஆகஸ்ட் 18, இங்கிலாந்துடன் ஆகஸ்ட் 20ல் இந்தியா மோதுகிறது.