ஓர்லியான்ஸ்: ஓர்லியான்ஸ் மாஸ்டர்ஸ் பேட்மின்டன் ஆடவர் ஒற்றையர் போட்டியில் நேற்று, இந்திய வீரர் ஆயுஷ் ஷெட்டி, சக இந்திய வீரர் கிரண் ஜார்ஜை முதல் சுற்றில் வெற்றி கண்டார். பிரான்சின் ஓர்லியான்ஸ் நகரில் ஓர்லியான்ஸ் மாஸ்டர்ஸ் பேட்மின்டன் போட்டிகள் நடந்து வருகின்றன. நேற்று நடந்த ஆடவர் ஒற்றையர் முதல் சுற்றுப் போட்டியில் இந்திய வீரர்கள் ஆயுஷ் ஷெட்டி – கிரண் ஜார்ஜ் மோதினர். இப்போட்டியின் முதல் செட்டை 21-17 என்ற புள்ளிக் கணக்கில் கிரணும், 2வது செட்டை 21-10 என்ற புள்ளிக்கணக்கில் ஆயுஷ் ஷெட்டியும் கைப்பற்றினர். அதைத் தொடர்ந்து வெற்றியை தீர்மானிக்கும் வகையில் நடந்த 3வது செட்டில் சிறப்பாக ஆடிய ஆயுஷ் 21-17 என்ற புள்ளிக்கணக்கில் வெற்றி கண்டார். அதனால் 2-1 என்ற செட் கணக்கில் வென்ற அவர் 2வது சுற்றுக்கு முன்னேறினார். மற்றொரு போட்டியில் இந்திய வீரர் காந்த் கிடாம்பி, 12-21, 10-21 என்ற நேர் செட்களில் டென்மார்க் வீரர் மேக்னஸ் ஜோஹனேசனிடம் வீழ்ந்தார்.
மகளிர் ஒற்றையரில் அன்மோல் வெற்றி
ஓர்லியான்ஸ் மாஸ்டர்ஸ் பேட்மின்டன் மகளிர் பிரிவு ஒற்றையர் முதல் சுற்றுப் போட்டியில் நேற்று இந்திய வீராங்கனை அன்மோல் கார்ப், துருக்கி வீராங்கனை நெஸ்லிஹான் ஆரின் உடன் மோதினார். துவக்கம் முதல் சிறப்பாக ஆடிய அன்மோல் கார்ப், 21-12, 21-16 என்ற நேர் செட்களில் வெற்றி வாகை சூடி 2ம் சுற்றுக்கு முன்னேறினார். மற்றொரு போட்டியில் இந்திய வீராங்கனை ரக்சிதா ராம்ராஜ், ஜப்பான் வீராங்கனை எம் சுய்ஸுவிடம் 9-21, 15-21 என்ற நேர் செட்களில் வீழ்ந்தார். இன்னொரு போட்டியில் இந்திய வீராங்கனை தேவிகா ஸிஹாக்கை, 15-21, 21-14, 21-15 என்ற செட் கணக்கில் ஹாங்காங் வீராங்கனை ஹேப்பி லோ சின் யான் வெற்றி கண்டார்.
