சேலம் மாவட்டத்தில் 11 சட்டமன்றத் தொகுதிகள் உள்ளன. இதில் மிகவும் பரபரப்பான தொகுதி என்ற பெயர் ஓமலூருக்கு உண்டு. 80 சதவீதம் கிராமங்கள் நிறைந்த இந்த ெதாகுதியில் அனைத்து சமூக மக்களும் கணிசமாக உள்ளனர். ஆனால் வன்னிய சமுதாய மக்கள் பெரும்பான்மையாக உள்ளனர். இந்த தொகுதியில் இதுவரை திமுக 2 முறை, காங்கிரஸ் ஒரு முறை, அதிமுக 8 முறை, தமாகா ஒரு முறை, பாமக ஒரு முறை வெற்றி ெபற்றுள்ளது. இது ஒருபுறமிருக்க, இந்த தொகுதியின் முன்னாள் எம்எல்ஏ பல்பாக்கி கிருஷ்ணன், இந்த முறை தமிழக வெற்றிக்கழகத்தில் இணைந்து இந்த தொகுதியில் போட்டியிட ஆயத்தமாகி வருகிறார். அதிமுகவில் ஜெ.அணி, ஜா.அணி என்று பிரிந்தபோது ஜெ.அணி சார்பில் சேவல் சின்னத்தில் நின்று வெற்றி பெற்றவர்களில் பல்பாக்கி கிருஷ்ணனும் ஒருவர். இப்படிப்பட்டவர், விஜய் கட்சியில் இணைந்து விசில் ஊத உள்ளதால் அதிமுக வட்டாரங்களில் பரபரப்பு நிலவி வருகிறது.
இதுகுறித்து உள்ளூர் நிர்வாகிகள் கூறுகையில், ‘‘எடப்பாடி பழனிசாமியை போல், ஜெ.அணியில் சேவல் சின்னத்தில் நின்று வெற்றி பெற்றவர் பல்பாக்கி கிருஷ்ணன். அதன்பிறகு ஒருங்கிணைந்த அதிமுக சார்பில் 1991 மற்றும் 2011ம் ஆண்டு, ஓமலூர் தொகுதியில் போட்டியிட்டு வெற்றி பெற்று எம்எல்ஏ ஆனார். இந்த வகையில் கட்சியின் முன்னோடியான பல்பாக்கி கிருஷ்ணன், இந்தமுறை நடிகர் விஜய்யின் தமிழக வெற்றிக்கழகம் சார்பில் இந்த தொகுதியில் போட்டியிட அதிக வாய்ப்புகள் உள்ளது. செங்கோட்டையனின் வழிகாட்டுதல் படி தவெகவில் இணைந்தார் பல்பாக்கி கிருஷ்ணன். அவரது பரிந்துரையின் பேரில் பல்பாக்கி கிருஷ்ணனுக்கு போட்டியிடும் வாய்ப்பை விஜய் கொடுப்பார். ஜெயலலிதா தனி அணியாக நின்றபோது, சேவலை கூவ வைத்தவர். இந்த முறை விசிலை ஊத வைக்க வருகிறார். இது அதிமுகவினர் மத்தியில் பரபரப்பாக பேசப்படுகிறது,’’ என்றனர்.
இதுமட்டுமன்றி 2006ம் ஆண்டு இந்த தொகுதியில் பாமக வேட்பாளராக போட்டியிட்டு வெற்றி ெபற்ற தமிழரசு, அக்கட்சியில் இருந்து விலகினார். பின்னர் திமுகவில் இணைந்தவருக்கு மாநில விவசாய அணி இணை செயலாளர் பொறுப்பு வழங்கப்பட்டது. இந்தநிலையில் சமீபத்தில் அதிமுக பொதுச்செயலாளர் எடப்பாடி பழனிசாமியை சந்தித்த தமிழரசு, அக்கட்சியில் தன்னை இணைத்துக் கொண்டார். ஓமலூர் தொகுதியில் போட்டியிட வாய்ப்பு கிடைக்கும் என்ற எண்ணத்தில் அவர் அதிமுகவில் இணைந்துள்ளார். அதேநேரத்தில் அதிமுகவில் சிட்டிங் எம்எல்ஏ உள்ளிட்ட முக்கிய நிர்வாகிகளும் ஓமலூருக்கு மல்லுக்கட்டுவது தேர்தல் களத்தில் சூட்டை கிளப்பியுள்ளது.
