நன்றி குங்குமம் டாக்டர்

காலை எழுந்ததும் இன்ஸ்டாவில் ஒரு ரீல். இந்த உடற்பயிற்சியைச் செய்தால் மூட்டு வலி பறந்து போகும் என ஒரு இன்ஃப்ளுயன்சர் பரிந்துரை செய்கிறார். அப்படியே பிசியோ நிபுணரிடம் போனால் ‘அது உங்களுக்கு சரியான பயிற்சி இல்லை நிறுத்துங்க’ என்கிறார்.இப்போ அனைவருக்கும் எழும் ஒரு முக்கியமான கேள்வி… மருத்துவரா இன்ஃப்ளூயன்சரா யார் சொல்வதை நம்புவது?

இதைப் படிக்கும் எல்லோருக்கும் தெரியும். டாக்டர்தான் சிறந்த ஆலோசனையைச் சொல்லக்கூடியவர். ஆனாலும் இப்பொழுது இருக்கும் டிஜிட்டல் உலகத்தில் நாம் அதிகமாக பார்ப்பது இன்ஃப்ளுயன்சர்களின் முகத்தையும் அவர்களுக்கு இருக்கும் ஃபாலோயர்ஸ்களையும் (followers) அவர்களுக்கு குவியும் லைக்ஸ்களையும்தான். அதன் பின் இருக்கும் கமெண்ட்ஸ்களையும் (comments) நாம் பார்த்து அவர்கள் சொல்வது நல்லதுதான் என ஒரு முடிவுக்கு வருகிறோம்.

சிலர் அறிவியல் ஆதாரங்களுடன் கூடிய சரியான தகவல்களை பகிர்ந்தாலும் பலர் எந்தவித முறையான கல்வியும் இல்லாமல் தவறான மற்றும் உடல் நலத்திற்கு கேடு விளைவிக்கும் ஆலோசனைகளை வழங்குகின்றனர். முழுமையற்ற சமூக ஊடக தகவல்களும் அதன் ஆபத்தான தாக்கமும்

முழுமை எனும் மாயக்காட்சி

சமூக ஊடகங்கள் இன்று குறைவே இல்லாத உடல் அமைப்புகள், எளிதாக செய்வது போல காட்டப்படும் கடின உடற்பயிற்சிகள் என்ற படங்களால் நிரம்பியுள்ளது. இவை பெரும்பாலும் உண்மையை பிரதிபலிக்காத, எடிட் செய்யப்பட்ட அல்லது ஃபில்டர்கள் பயன்படுத்தப்பட்ட காட்சிகள்.

இப்படிப்பட்ட “பரிபூரண” உடல்நிலைகள் சாதாரண மனிதர்களுக்கு எட்டாதவை. இதை தொடர்ந்து பார்க்கும் போது, “என்னிடம் ஏன் இப்படி இல்லை?” என்ற தாழ்வு மனப்பான்மை உருவாகி, உடல் குறித்த தவறான எண்ணங்களும், தன்னம்பிக்கை குறைவும் ஏற்படுகிறது. 2023-ல் வெளியான ஒரு ஆய்வில், பிரபலமான 100 ஃபிட்னஸ் இன்ஃப்ளூயன்சர்கள் கணக்குகளில் சுமார் மூன்றில் இரண்டு பங்கு கணக்குகள் ஆரோக்கியமற்ற அல்லது ஆதாரமற்ற உடல் வடிவங்களை ஊக்குவிப்பதாக கண்டறியப்பட்டது.

100 நாள்/ 75 நாள் கடின சவால்கள் நம் உடலுக்கு கடினமாக மாறலாம்

சமீப காலமாக பல ஃபிட்னஸ் இன்ஃப்ளூயன்சர்கள் “100 days challenge”, “75 days hard challenge” போன்றவற்றை ஊக்குவித்து, இடைவிடாத கடுமையான உடற்பயிற்சி மற்றும் கடைபிடிக்க முடியாத டயட் முறைகளை தொடர்ந்து செய்ய வேண்டும் என்ற அழுத்தத்தை உருவாக்குகிறார்கள். சிலர் உடல் வலி, காய்ச்சல், அதிக சோர்வு போன்ற நிலைகளிலும் “நான் விடமாட்டேன்” என்று workout தொடர்வதை வீடியோவாக பதிவிடுவதால், வலி இருந்தாலும் exercise செய்ய வேண்டும் என்ற தவறான நம்பிக்கை பொதுமக்களிடம் உருவாகிறது.

மருத்துவ பார்வையில், வலி, காய்ச்சல், வைரல் தொற்று போன்றவை உடல் தரும் எச்சரிக்கை அறிகுறிகள்; அந்த நேரத்தில் உடலுக்கு ஓய்வே தேவையானது. ஓய்வு இல்லாமல் கடுமையான வொர்க் அவுட் (workout) மற்றும் கடுமையான டயட் (strict diet) தொடர்வது காயம், நரம்பு பிரச்னை, இதய அழுத்தம் மற்றும் நீண்டகால உடல் பாதிப்புகள் வரை கொண்டு செல்லலாம். குறிப்பாக சர்க்கரை, உயர் ரத்த அழுத்தம், கொலஸ்ட்ரால் போன்ற இணை நோய்கள் உள்ளவர்கள், வயது அதிகமானவர்கள் அல்லது உடல் திறன் குறைவானவர்களுக்கு இத்தகைய சவால்கள் மிக ஆபத்தானவை.

சமூக ஊடகங்களில் பகிரப்படும் உடற்பயிற்சி மற்றும் ஆரோக்கியக் காணொளிகள் முழு உண்மையை காட்டுகிறதா என்பதை நாம் உறுதியாக அறிய முடியாது. அந்தக் காணொளியில் தோன்றும் இன்ஃப்ளூயன்சர் அதிக வலியைத் தாங்கும் உடல் திறன் கொண்டவராகவோ, நீண்ட கால பயிற்சியின் விளைவாக அந்த நிலையை அடைந்தவராகவோ இருக்கலாம். ஆனால் அதே சக்தி, மீட்பு வேகம், நரம்பு-தசை ஒருங்கிணைப்பு எல்லோருக்கும் ஒரே மாதிரி இருக்காது. ஒவ்வொரு உடலும் தனித்துவமானது; ஒருவரால் செய்ய முடிந்த உடற்பயிற்சி, மற்றொருவருக்கும் பாதுகாப்பானதாக இருக்கும் என்பதற்கு எந்த உத்தரவாதமும் இல்லை.

“உடல் நிலை சரியில்லை என்றாலும் உடற்பயிற்சி பண்ணணும்”, “சவால் விடுபடக்கூடாது” என்ற செய்தி ஊக்கம் (motivation) அல்ல – அது தவறான தகவல் (misinformation). ஒரு நல்ல ஃபிட்னெஸ் நிபுணர் அல்லது இயன்முறை நிபுணர் (physiotherapist), நோய் அல்லது தீவிரமான வலி (severe pain) இருக்கும் நிலையில் உடற்பயிற்சி தொடரச் சொல்லமாட்டார். பாதுகாப்பு, ஓய்வு, மீட்டு எடுத்தல் (recovery), சீர்செய்தல் (modification) ஆகியவையும் உடற்தகுதியின் ஒரு பகுதிதான். வலியைப் பொருட்படுத்தாமல் தொடரச் சொல்லும் சவால்கள் மற்றும் உடல் சமிக்ஞைகளை (body signals) மதிக்காத அறிவுறுத்தல் மற்றும் பரிந்துரைகள் எல்லாம் தெளிவான ரெட் ஃப்ளாக்ஸ்தான் (Red flags).

வலி விஞ்ஞானம் Vs வைரல் விஞ்ஞானம் (Pain Science- Vs Viral Science)“இந்த உடற்பயிற்சி செய்தால் எல்லா முதுகு வலியும் சரியாகிவிடும்” அல்லது “best five exercises for back pain” போன்ற பொதுவான கூற்றுகள் மக்களை தவறான நம்பிக்கைக்கு கொண்டு செல்கின்றன. மருத்துவ ரீதியாக பார்த்தால், முதுகு வலி (back pain) என்பது ஒரே மாதிரியான பிரச்னை அல்ல; அது பல காரணங்களால் உருவாகும் ஒரு நிலை. தசை வலி, டிஸ்க் தொடர்பான பிரச்னைகள், நரம்பு அழுத்தத்தால் வரும் வலி, தவறான உடல் நிலை காரணமான வலி, அழற்சி சார்ந்த வலி ஆகியவை அனைத்தும் வேறுபட்டவை. இந்த ஒவ்வொரு வகைக்கும் சிகிச்சை முறையும், உடற் பயிற்சி தேர்வும் வேறுபட வேண்டும்.

ஒரு குறிப்பிட்ட வகை முதுகு வலிக்கு உதவியாக இருக்கும் உடற்பயிற்சி, வேறு வகை முதுகு வலி உள்ள ஒருவருக்கு செய்தால், வலியை குறைப்பதற்குப் பதிலாக அதிகரிக்கக்கூடும். அதனால் எல்லோருக்கும் பொருந்தும் ஒரே மாதிரியான உடற்பயிற்சி, பட்டியல் சொல்லுவது அறிவியல் அடிப்படையற்றது. உடற்பயிற்சி என்பது தனிப்பட்டது; அது ஒருவரின் வலி வகை, உடல் நிலை, வயது, வாழ்க்கை முறை, முன்னைய காயங்கள் போன்றவற்றை மதிப்பீடு செய்து தேர்வு செய்யப்பட வேண்டும்.

சமூக ஊடகங்களில் சொல்லப்படும் பொதுவான உடற்பயிற்சி எந்த மருத்துவ ஆலோசனையும் இல்லாமல் அப்படியே பின்பற்றுவது, குறுகிய காலத்தில் வலியை அதிகரிப்பதோடு, நீண்டகால முதுகு பிரச்னைகள் மற்றும் நிரந்தர பாதிப்புகளுக்கும் வழிவகுக்கலாம். எனவே உடற்பயிற்சி மற்றும் ஆரோக்கியம் தொடர்பான முடிவுகளை எடுக்கும் போது, சமூக ஊடகக் காணொளிகளை வழிகாட்டுதலாக அல்லாமல், தகவலாக மட்டுமே பார்க்க வேண்டும்; உண்மையான தீர்வு எப்போதும் தகுதி பெற்ற மருத்துவ அல்லது இயன்முறை நிபுணர்களின் மதிப்பீடும் வழிகாட்டுதலும்தான்.

ஃபிட்னெஸ் – எடை குறைவு

பல ஃபிட்னஸ் இன்ஃப்ளூயன்சர்கள் முதலில் ஊக்குவிப்பது “பர்ஃபெக்ட் பாடி” என்ற தவறான கருத்துதான். ஒரே மாதிரியான உடல் அமைப்பு, ஒரு குறிப்பிட்ட எடை, ஸ்லிம் அல்லது சிக்ஸ்பேக் உடல் இருந்தால்தான் பிட்னெஸ் என்று அவர்கள் காட்டுகிறார்கள்; “இந்த simple routine follow பண்ணினா இதே body structure கிடைக்கும்” என்ற வாக்குறுதிகளும் அதிகம். ஆனால் உண்மையில் எடை குறைவு மட்டும் பிட்னெஸ் அல்ல. பிட்னெஸ் என்பது உடலுக்குள் நடக்கும் விஷயம் – இதயம் நன்றாக வேலை செய்கிறதா, மூச்சு சீராக வருகிறதா, தசைகள் மற்றும் மூட்டுகள் வலியில்லாமல் இயங்குகிறதா, தினசரி வேலைகளை சோர்வில்லாமல் செய்ய முடிகிறதா என்பதே அதன் அளவுகோல்.

வெளியில் அழகாகத் தோன்றும் உடல், உள்ளுக்குள் ஆரோக்கியமாக இருப்பதற்கான சான்று அல்ல. ஒவ்வொரு உடலும் வேறுபட்டது; அதனால் ஒரே விதமான உடலமைப்பு (body structure) எல்லோருக்குமானது என்பது யதார்த்தமல்ல. ஃபிட் பாடி காட்டுவது ஃபிட்னெஸ்க்கு ஆதாரம் அல்ல; உடல் செயல்பாடு, சக்தி மற்றும் ஆரோக்கியம் சமநிலையில் இருப்பதுதான் உண்மையான பிட்னெஸ்.

நம்பகமான மருத்துவ ஆலோசனைகளை தேர்வு செய்வதற்கான வழிகாட்டுதல்கள்:

1. தகுதி மற்றும் அனுபவம் உள்ளவர்களா?

முதலில் அந்த இன்ஃப்ளூயன்சருக்கு முறையான கல்வி, சான்றிதழ்கள் அல்லது தொழில்முறை அனுபவம் உள்ளதா என்பதை கவனியுங்கள். Fitness training, nutrition, exercise physiology, physiotherapy போன்ற துறைகளில் படித்தவர்கள் அல்லது பயிற்சி பெற்றவர்கள் வழங்கும் தகவல்கள் அறிவியல் அடிப்படையிலும் பாதுகாப்பாகவும் இருக்கும். வெறும் உடல் அமைப்பை வைத்தே நம்புவது தவறான முடிவுகளுக்குக் காரணமாகலாம்.

2. சமநிலையான அணுகுமுறை உள்ளதா?

ஒரு நல்ல இன்ஃப்ளூயன்சர் “உடலை பற்றி கேட்பது”, “மெதுவாக முன்னேற்றம் அடைவது”, “தொடர்ச்சியான முயற்சி” ஆகியவற்றின் முக்கியத்துவத்தை வலியுறுத்துவார். உடற்பயிற்சி என்பது உடனடி மாற்றம் அல்ல; அது காலமும் பொறுமையும் தேவைப்படும் பயணம் என்பதை அவர்கள் தெளிவாகச் சொல்ல வேண்டும். உடல் ஆரோக்கியத்துடன் மனநலமும் முக்கியம் என்பதை நினைவூட்டும் அணுகுமுறை இருந்தால் மட்டுமே அது நிலையான முன்னேற்றத்தை தரும்.

3. உண்மையானவர்களா, வெளிப் படையானவர்களா?

ஒவ்வொருவருக்கும் வாழ்க்கையில் சவால்களும் பின்னடைவுகளும் உண்டு. வெற்றியை மட்டுமே காட்டி, போராட்டங்களை மறைக்கும் இன்ஃப்ளூயன்சர்கள் யதார்த்தமற்ற எதிர்பார்ப்புகளை உருவாக்குகிறார்கள். தங்களின் தோல்விகள், சிரமங்கள், மெதுவான முன்னேற்றம் ஆகியவற்றையும் பகிரும் நபர்கள் அதிக நம்பகத்தன்மையுடன் இருப்பார்கள். இது “மாற்றம் சாத்தியமே, ஆனால் அதற்கு நேரம் தேவை” என்ற உண்மையை நினைவூட்டுகிறது.

4. உடல்-நட்பு மற்றும் உள்ளடக்கிய பார்வை உள்ளதா?

நம்பகமான பிட்னஸ் இன்ஃப்ளூயன்சர்கள் ஒரே உடல் வடிவம், ஒரே எடை, ஒரே பயிற்சி அனைவருக்கும் பொருந்தும் என்று கூறமாட்டார்கள். வெவ்வேறு உடல் வகைகள், உடல் திறன்கள், உடற்பயிற்சி நிலைகள் அனைத்தையும் மதித்து, பின்தொடர்பவர்களை ஊக்குவிப்பதே முக்கியம். தன்னலம், தன்னம்பிக்கை, சிறிய முன்னேற்றங்களைக் கொண்டாடுதல் போன்ற செய்திகள் ஆரோக்கியமான மனநிலையை உருவாக்க உதவுகின்றன.

5. உங்கள் மருத்துவர் அல்லது நிபுணரின் அனுமதி அவசியம்

புதிய உடற்பயிற்சி திட்டம், டயட் அல்லது ரூட்டீனை தொடங்கும் முன் உங்கள் மருத்துவர் அல்லது சுகாதார நிபுணரிடம் ஆலோசனை பெறுவது மிக முக்கியம். உங்கள் உடல் நிலை, வயது, பழைய காயங்கள், மருத்துவ வரலாறு ஆகியவற்றை கருத்தில் கொண்டு எது உங்களுக்கு பாதுகாப்பானது என்பதை அவர்கள் வழிகாட்டுவார்கள். அதன்பின் தகுதி பெற்ற பிட்னஸ் நிபுணருடன் தனிப்பட்ட ஆலோசனை அல்லது fitness assessment எடுத்துக்கொள்வது காயங்களைத் தவிர்க்க உதவும்.

சமூக ஊடகங்களில் உள்ள அனைத்து health promotion-உம் தவறானது அல்ல; சிலர் கர்ப்பப்பை புற்றுநோய் தடுப்பூசி, மனநலம், உடற்பயிற்சி போன்றவற்றை அறிவியல் அடிப்படையில் விளக்கி நல்ல விழிப்புணர்வை உருவாக்குகிறார்கள். ஆனால் எந்தத் தகுதியும் இல்லாமல், வெறும் உடல் மாற்றத்தை மட்டுமே அடிப்படையாக வைத்து fitness அல்லது wellness ஆலோசனைகள் வழங்குபவர்கள் அதிகரிப்பதே உண்மையான பிரச்னை.

உடல் மாற்றம் அறிவின் சான்றல்ல; அது தனிப்பட்ட பயணம் மட்டுமே. எனவே சமூக ஊடக சுகாதார உள்ளடக்கத்தை (health content) பின்பற்றும்போது, புகழை விட அந்த நபரின் தகுதி, அறிவியல் புரிதல் மற்றும் ஆதாரபூர்வ அறிவு உள்ளதா என்பதைச் சரிபார்ப்பதே முக்கியம்; ஏனெனில் ஆரோக்கியம் ஒரு trend அல்ல, பொறுப்புடன் அணுக வேண்டிய துறை.முடிவாக, உங்கள் உடலே முதன்மை – likes, views, trends அல்ல.

தொகுப்பு: இயன்முறை மருத்துவர் நித்யா மூர்த்தி