அதிமுக, பாமகவினர் 1000 பேர் திமுகவில் ஐக்கியம்

தஞ்சாவூர் மாவட்டம் கும்பகோணம் அடுத்த அண்ணலக்ரஹாரம் ஊராட்சியில் உள்ள சோழன் மஹாலில் மாற்று கட்சிகளான அதிமுக, பாமகவை சேர்ந்த ஆண்கள், பெண்கள் என 1000 பேர், திமுக எம்எல்ஏ சாக்கோட்டை அன்பழகன் தலைமையிலும், முன்னாள் அமைச்சர் வைத்திலிங்கம், மாநகர திமுக செயலாளர் சு.ப.தமிழழகன் ஆகியோர் முன்னிலையிலும் திமுகவில் நேற்று இணைந்தனர்.

அப்போது வைத்திலிங்கம் அளித்த பேட்டி: முதல்வர் மு.க.ஸ்டாலின் செய்துள்ள சாதனை செயல் திட்டங்களை மக்கள் மனதார வாழ்த்துகின்றனர். குறிப்பாக பெண்கள் அனைவரும் வாழ்த்துகிறார்கள். இயற்கையாகவே திமுக தான் ஆட்சிக்கு வரும் என்று மக்கள் பேசிக் கொள்கிறார்கள்.

தஞ்சாவூர் மாவட்டத்தில் கடந்த தேர்தலில் 7 தொகுதிகளை திமுக கைப்பற்றியது. தற்போது நிச்சயமாக மாவட்டத்தில் உள்ள 8 தொகுதிகளிலும் சுலபமாக திமுக வெற்றி பெறும். எடப்பாடி பழனிசாமிக்கு நம்முடைய எதிர்ப்பு என்பது நமது செயல்பாடுகள் தான். வெற்றியை தான் அவருக்கு எதிர்ப்பாக காட்ட வேண்டும். இவ்வாறு அவர் கூறினார்.