சென்னை: எதிரி நீர்மூழ்கிகளை வேட்டையாடும் ‘டால்பின் ஹன்டர்’ ஐஎன்எஸ் அஞ்சடீப் போர்கப்பல் கடற்படையில் இணைந்தது. இந்திய கடலில் இனி எதிரிகளுக்கு ஒளிந்துகொள்ள இடமில்லை. கடலுக்கு அடியில் மறைந்திருக்கும் நீர்மூழ்கிக் கப்பல்களை வேட்டையாடும் திறன்படைத்த புதிய போர்க்கப்பல் ஐஎன்எஸ் அஞ்சடீப் நேற்று இந்திய கடற்படையில் இணைக்கப்பட்டது. சென்னை துறைமுகத்தில் நடந்த சிறப்பு விழாவில் கடற்படைத் தலைமை அதிகாரி அட்மிரல் தினேஷ் கே. திரிபாதி மூத்த கடற்படை அதிகாரிகள், அரசு பிரதிநிதிகள் மற்றும் கப்பல் கட்டும் நிறுவன நிர்வாகிகள் முன்னிலையில் இந்தக் கப்பலை தேசத்திற்கு அர்ப்பணித்தார்.

கர்நாடக மாநிலம் கார்வார் கடலோரத்தில் அரேபியக் கடலில் அமைந்துள்ள அஞ்சடீப் தீவின் பெயரை தாங்கிவரும் இந்தக் கப்பல், நீர்மூழ்கிக் கப்பல் எதிர்ப்பு போரிலும், கடலோரக் கண்காணிப்பிலும் சிறப்பாக செயல்படும் வகையில் வடிவமைக்கப்பட்டுள்ளது. ‘‘டால்பின் ஹன்டர்” என்ற சிறப்புப் பெயரில் அழைக்கப்படும் இந்தக் கப்பல், கடலுக்கு அடியில் ஒளிந்திருக்கும் எதிரி நீர்மூழ்கிகளை தேடி கண்டுபிடித்து அழிக்கும் ஆற்றல் படைத்தது. இந்தியாவின் விரிவான கடல் நலன்களை பாதுகாக்கவும், கடல் வழி வணிகப் பாதுகாப்பை உறுதிசெய்யவும் இந்த கப்பல் முக்கிய பங்கு வகிக்கும் என்று கடற்படை தெரிவித்துள்ளது.

77 மீட்டர் நீளமுள்ள இந்தக் கப்பல், உயர்தர நீர் வெளியேற்ற இயக்க முறை மூலம் மணிக்கு 25 நாட்டிகல் மைல் வேகத்தில் பாய்ந்து செல்லும். விரைவான எதிர்வினை மற்றும் தொடர் நடவடிக்கைகளுக்கு ஏற்றவாறு இந்த வேக அமைப்பு வடிவமைக்கப்பட்டுள்ளது. முழுக்க முழுக்க இந்தியாவிலேயே தயாரிக்கப்பட்ட நவீன ஆயுதங்கள் மற்றும் கருவிகள் இதில் பொருத்தப்பட்டுள்ளன. கடலுக்கு அடியில் நீர்மூழ்கிகளை துல்லியமாக கண்டறியும் அபய் சோனார், லைட்வெட் டார்பெடோக்கள் மற்றும் எஏஎஸ்டபுள்யூ ராக்கெட்டுகள் இதன் முக்கிய ஆயுதங்கள் ஆகும். கடலோர மற்றும் ஆழமற்ற நீர்ப்பகுதிகளில் நடைபெறும் சவாலான சூழல்களிலும் தடையின்றி செயல்படும் வகையில் இந்தக் கப்பல் தனித்துவமாக வடிவமைக்கப்பட்டுள்ளது என்று கடற்படை வட்டாரங்கள் தெரிவிக்கின்றன. கொல்கத்தாவில் உள்ள கார்டன் ரீச் ஷிப்பில்டர்ஸ் அண்ட் இஞ்சினியர்ஸ் நிறுவனம் கட்டிய இந்தக் கப்பல், நீர்மூழ்கிக் கப்பல் எதிர்ப்பு ஆழமற்ற நீர்ப்பகுதி திட்டத்தின் கீழ் உருவாகும் எட்டு கப்பல்களில் மூன்றாவதாகும்.