*ஒரு மாத காலத்திற்கு போக்குவரத்து நிறுத்தம்
நெல்லை : நெல்லை சந்திப்பு பஸ்நிலையத்தில் உடையார்பட்டி வழியாக செல்லும் மதுரை சாலையில் சுமார் ஒரு கோடி மதிப்பில் 3 பாலங்கள் மற்றும் கழிவுநீரோடை அமைக்கும் பணிகள் துரிதமாக நடந்து வருகின்றன.
இதையொட்டி நெல்லை சந்திப்பு மதுரை சாலையில் ஒரு மாத காலத்திற்கு போக்குவரத்து நிறுத்தப்பட வாய்ப்புகள் உள்ளன.நெல்லை மாநகரின் மைய பகுதியாக உள்ள நெல்லை சந்திப்பு பஸ் நிலையம் ஒரு மழைக்கே தாக்குபிடிக்க முடியாத அவல நிலையில் உள்ளது.
ஒருநாள் அடைமழை பெய்தால், நெல்லை சந்திப்பு பஸ்நிலையத்தை சுற்றிலும் தண்ணீர் பெருகி நிற்பது வாடிக்கையாக உள்ளது. குறிப்பாக சந்திப்பு பஸ்நிலையத்திற்கு மேற்கு வாசல் பகுதியில் மழைநீர் அதிகப்படியாக தேங்குவதால் வாகனங்கள் செல்ல வழியில்லை.
அச்சாலையும் குண்டும், குழியுமாக இருப்பதால், பல வாகனங்கள் விழுந்து எழுந்து செல்கின்றன. இந்நிலையில் அப்பகுதியில் மழைநீர் வடிகாலை சரி செய்யவும், மதுரை சாலையில் முறையாக பாலங்கள் அமைக்கவும் நெல்லை மாநகராட்சி சார்பில் முடிவு செய்யப்பட்டுள்ளது.
அதன்பேரில் நெல்லை சந்திப்பு ரயில் நிலையம் மற்றும் காவலர் குடியிருப்பு பின்பகுதியில் உள்ள குளத்தில் இருந்து வரும் மழைநீரை, தாமிரபரணி ஆற்றுப்பகுதிக்கு கொண்டு செல்ல தற்போது ரூ.99 லட்சம் செலவில் மழைநீர் வடிகால் ஓடை பணிகள் அமைக்கப்பட்டு வருகின்றன. இதுபோன்று நெல்லை சந்திப்பு, மதுரை சாலையில் மழைநீர் செல்லும் வகையில் 3 பாலங்கள் அமைக்கும் பணிகள் நடந்து வருகின்றன.
அதன்படி முதல் பாலம் சிந்துபூந்துறைக்கு செல்லும் சாலை அருகேயும், அதையடுத்து தனியார் ஓட்டல் அருகேயும், 3வது பாலம் உடையார்பட்டி குளத்தை ஒட்டியுள்ள தனியார் மருத்துவமனை அருகேயும் நடந்து வருகிறது. இதில் ஒரு பாலம் ரூ.40 லட்சம் செலவிலும், மற்ற இரு பாலங்களும், ஒரு கழிவுநீரோடையும் ரூ.66 லட்சம் செலவிலும் அமைக்கப்பட்டு வருகின்றன.
இப்பணிகள் நடைபெறுவதை ஒட்டி நெல்லை சந்திப்பில் இருந்து உடையார்பட்டி பகுதி வரைக்கான போக்குவரத்து அடுத்த ஒரு மாத காலம் நிறுத்தப்பட்டுள்ளது. இந்நிலையில் நெல்லை சந்திப்பு- சிந்துபூந்துறை திருப்பத்தில் பழமையான ஆலமரமும் சாய்ந்தததால், அதை அகற்றும் பணிகளும் துரிதமாக மேற்கொள்ளப்பட்டு வருகின்றன. இப்பணிகள் முடிவடையும் பட்சத்தில் நெல்லை சந்திப்பு பகுதியில் மழைநீர் தேங்குவது குறையும் என தெரிவிக்கப்பட்டுள்ளது.
