புதுச்சேரி: பாமகவில் கட்சி தலைவர் யார் என்பதில் ஆரம்பித்து, தற்போது கட்சி யாருக்கு என்ற அளவில் தந்தை ராமதாஸ், மகன் அன்புமணி இடையே மோதல் ஏற்பட்டது. பாமக தலைவர் என்று தன்னை அறிவிக்க வேண்டும் என்றும், பாமக கட்சி கொடி, சின்னம் அன்புமணி பயன்படுத்த தடைவிதிக்ககோரி சென்னை சிட்டி சிவில் கோர்டில் வழக்கு தொடர்ந்துள்ளார். இந்த வழக்கில் நீதிபதி தர்மபிரபு, தேர்தல் ஆணையம் மற்றும் அன்புமணி ராமதாஸ் ஆகியோர் விரிவான பதில் மனு தாக்கல் செய்ய உத்தரவிட்டு வழக்கை மார்ச 9ம் தேதிக்கு ஒத்தி வைத்துள்ளார்.

வரும் தேர்தலில் அன்புமணி ராமதாஸ் அதிமுகவுடன் கூட்டணியில் சேர்ந்து போட்டியிட முடிவு செய்து, தேர்தல் பணிகளில் ஈடுபட்டு வருகிறார். பாமக நிறுவனர் ராமதாஸ் இதுவரை, கூட்டணி தொடர்பாக வெளிப்படையாக அறிவிக்காமல் மவுனம் காத்து வருகிறார். கடந்த சில தினங்களாக பாஜ மற்றும் தவெக நிர்வாகிகள் ராமதாசிடம் பேசி வருவதாக கூறப்படுகிறது. அதற்கேற்ப நிர்வாக குழு கூட்டத்தை நடத்தி கூட்டணி சம்பந்தமாக அவ்வப்போது நிர்வாகிகளிடம் கருத்து கேட்டு வருகிறார். அதில் பெரும்பாலான உறுப்பினர்கள் தவெகவுடன் செல்லலாம் என கருத்து தெரிவித்துள்ளதாக தெரிகிறது.

ஆனால் கூட்டணியில் தென் மாவட்டங்கள் மட்டுமே ஒதுக்கப்படுவதால், அந்த கூட்டணியில் பயனில்லை என்று ராமதாஸ் கருதுகிறார். மேலும் ஒரு சில உறுப்பினர்கள் அதிமுகவுடன் கூட்டணி அமைக்கலாம் என தெரிவித்த நிலையில், அங்கு ஏற்கனவே அன்புமணி இருப்பதால், சரிப்பட்டு வராது என ராமதாஸ் கூறியதாக தெரிகிறது. இதுபோன்ற சூழலில் திமுக, அதிமுக கூட்டணி கதவுகள் ஏறக்குறைய அடைபட்ட நிலையில் ராமதாஸ் என்ன முடிவு எடுக்கப் போகிறார் என்ற பரபரப்பு எழுந்துள்ளது. தமிழக அரசியல் நிலவரம், கூட்டணி நிலைப்பாடு குறித்து ஆலோசனை கூட்டம் திண்டிவனம் அடுத்த தைலாபுரத்தில் இன்று பாமக நிறுவனர் ராமதாஸ் தலைமையில் கூடியுள்ளது.

இதில் வன்னியர் சங்க மாநில நிர்வாகிகள், மாவட்ட செயலாளர்கள், தலைவர்கள் மற்றும் பாமக மாநில, மாவட்ட செயலாளர்கள், தலைவர்கள் உள்ளிட்ட முக்கிய நிர்வாகிகள் 300க்கும் மேற்பட்டோர் பங்கேற்றுள்ளனர். இதில் செயல் தலைவர் காந்தி, வன்னியர் சங்க தலைவர் பு.த.அருள்மொழி, எம்எல்ஏக்கள் ஜிகே. மணி, அருள் மற்றும் பாமக முக்கிய நிர்வாகிகள் பங்கேற்றுள்ள நிலையில் கூட்டணி தொடர்பாக அவர்களின் கருத்துக்களை ராமதாஸ் கேட்டறிந்து வருகிறார்.