நியூயார்க்: அமெரிக்காவின் பிரபல பாலியல் குற்றவாளியான மறைந்த எப்ஸ்டீனின் கோப்புகள் இருந்து 30 லட்சம் பக்கங்கள் வெளியிடப்பட்டுள்ளன. அதில் அதிபர் டிரம்ப், எலான் மஸ்க், பில் கேட்ஸ் உள்ளிட்டவர்களின் அந்தரங்க தகவல் அதிர்ச்சியை ஏற்படுத்தி உள்ளது. அமெரிக்காவின் பிரபல கோடீஸ்வரரும் நிதியாளருமான ஜெப்ரி எப்ஸ்டீன், சிறுமிகளை வைத்து பாலியல் தொழில் செய்தது உள்ளிட்ட பல்வேறு பாலியல் குற்றங்களில் சிக்கினார். 2019ல் நியூயார்க் சிறையில் அடைக்கப்பட்ட அவர் மர்மமான முறையில் இறந்தார்.
அவர் தற்கொலை செய்து கொண்டதாக கூறப்பட்டாலும், எப்ஸ்டீனுக்கு அதிபர் டிரம்ப் உள்ளிட்ட அதிகார மட்டத்தில் பலருடன் நெருக்கமான உறவு இருந்ததால் பல ரகசியங்கள் வெளிவராமல் தடுக்க அவர் சிறையிலேயே கொல்லப்பட்டிருக்கலாம் என்றும் சந்தேகிக்கப்படுகிறது. பல்வேறு அரசியல் அழுத்தங்களுக்கு பிறகு சட்டம் இயற்றப்பட்டு, எப்ஸ்டீன் குறித்த விசாரணையில் சிக்கிய கோப்புகள் அமெரிக்க நீதித்துறையால் வெளியிடப்படுகின்றன. கடந்த டிசம்பரில் முதற்கட்ட ஆவணங்கள் வெளியான நிலையில் நேற்று முன்தினம் எப்ஸ்டீன் கோப்புகளில் இருந்து 30 லட்சம் பக்க ஆவணங்கள், 2,000க்கும் மேற்பட்ட வீடியோக்கள், 1.80 லட்சம் புகைப்படங்கள் வெளியிடப்பட்டுள்ளன.
இதில், டிரம்ப் குறித்த பல நூறு குறிப்புகள் உள்ளன. அவரது அரசியல் நடவடிக்கை, கொள்கை முடிவுகள், குடும்ப விவகாரம் என பல தகவல்கள் உள்ளன. எப்ஸ்டீன் தனது நண்பராக இருந்தாலும் அவரது பாலியல் குற்றங்கள் பற்றி தனக்கு தெரியாது என டிரம்ப் ஏற்கனவே கூறி உள்ளார். இதே போல, தொழிலதிபர் எலான் மஸ்க் குறித்து சில இமெயில்கள் கிடைத்துள்ளன. அதில் கரீபியனில் எப்ஸ்டீனுக்கு சொந்தமான தீவில் எலான் மஸ்க் வருவதாக விருப்பம் தெரிவித்த 2 இமெயில்கள் கிடைத்துள்ளன. மேலும், இங்கிலாந்து முன்னாள் இளரவரசர் ஆண்ட்ரூவுடனான இமெயிலில் அவருக்கு ரஷ்ய இளம்பெண்ணை எப்ஸ்டீன் அறிமுகப்படுத்தியதாகவும் அந்த பெண்ணை சந்திக்க ஆண்ட்ரூ ஆவலுடன் இருப்பதாகவும் இமெயிலில் கூறப்பட்டுள்ளது.
மைக்ரோசாப்ட் இணை நிறுவனரான பில் கேட்ஸ் குறித்து இமெயிலில் அவருக்கு திருமணம் தாண்டிய உறவு இருந்ததாக எப்ஸ்டீன் கூறி உள்ளார். ரஷ்ய பெண்களுடன் உறவு கொண்டதன் மூலம் பில் கேட்சுக்கு பால்வினை நோய் வந்ததாகவும் தனது முன்னாள் மனைவிக்கு தெரியாமல் அதற்கான மருந்துகளை அனுப்பி வைக்குமாறு பில் கேட்ஸ், எப்ஸ்டீனிடம் கேட்டுக் கொண்டதாகவும் கூறப்படுகிறது. இந்த குற்றச்சாட்டை பில் கேட்ஸ் தரப்பு முற்றிலும் மறுத்துள்ளது. மேலும், டிரம்ப் நிர்வாகத்தின் வர்த்தக அமைச்சர் லுட்னிக், நியூயார்க் நகர மேயர் மம்தானியின் தாயாரும் திரைப்பட இயக்குநருமான மீரா நாயர் உள்ளிட்டோரின் பெயர்கள் இடம் பெற்றுள்ளன. எப்ஸ்டீன் கோப்புகள் வெளியீடு அமெரிக்காவில் மீண்டும் பரபரப்பை ஏற்படுத்தி உள்ளது.
