சென்னை: சென்னையில் ஆபரணத்தங்கத்தின் விலை சவரனுக்கு ரூ.640 உயர்ந்து ரூ.1,01,440க்கு விற்பனை செய்யப்படுகிறது. சென்னையில் ஆபரணத் தங்கத்தின் விலை கிராமுக்கு ரூ.80 உயர்ந்து ரூ.12,680க்கு விற்பனை செய்யப்படுகிறது. சென்னையில் சில்லறை வர்த்தகத்தில் ஒரு கிராம் வெள்ளி விலை கிராமுக்கு ரூ.8 உயர்ந்து ரூ.265க்கு விற்பனை ஆகிறது.

தங்கம் விலை நேற்று முன்தினம் காலையில் பவுனுக்கு ரூ.480 குறைந்து, மாலையில் ரூ.640 அதிகரித்தது. தங்கம், வெள்ளி விலை ஆண்டு இறுதியான கடந்த டிசம்பர் மாதத்தில் தாறுமாறாக உயர்ந்து வந்தது. இதன் ஒரு பகுதியாக கடந்த மாதம் 27ம் தேதி ஒரு பவுன் ரூ.1 லட்சத்து 4,800க்கு விற்பனையாகி வரலாற்று உச்சத்தை பதிவு செய்தது. இதனால், நகை வாங்குவோர் கடும் அதிர்ச்சியடைந்தனர். அதன் பிறகு தங்கம் விலை குறைந்தது. அதாவது கடந்த 29ம் தேதி முதல் தொடர்சியாக 4 நாட்களில் தங்கம் விலை பவுனுக்கு ரூ.5,280 வரை குறைந்தது. இது நகை வாங்குவோருக்கு ஆறுதலை அளித்தது.

இந்நிலையில் 2 ம் தேதி தங்கம் விலை மீண்டும் அதிகரித்தது. தங்கம் விலை கிராமுக்கு ரூ.140 உயர்ந்து ஒரு கிராம் ரூ.12,580க்கும், பவுனுக்கு ரூ.1,120 உயர்ந்து ஒரு பவுன் ரூ.1,00,640க்கும் விற்றது. இதன் மூலம் தங்கம் விலை மீண்டும் 1 லட்சத்தை தாண்டி அதிர்ச்சியளித்தது. தங்கத்தை போல வெள்ளி விலையும் கிலோவுக்கு ரூ.4,000 உயர்ந்து, பார் வெள்ளி 2 லட்சத்து 60,000 ரூபாய்க்கும் விற்பனையானது.

இந்த நிலையில் நேற்று முன்தினம் காலை தங்கம் விலை திடீரென குறைந்தது. அதாவது, காலை கிராமுக்கு ரூ.60 குறைந்து ஒரு கிராம் ரூ.12,520க்கும், பவுனுக்கு ரூ.480 குறைந்து ஒரு பவுன் ரூ.1,00,160க்கு விற்றது. தங்கத்தை போல வெள்ளி விலையும் நேற்று முன்தினம் குறைந்தது. வெள்ளி விலை கிராமுக்கு ரூ.4 குறைந்து கிராம் ரூ.256க்கும், கிலோவுக்கு ரூ.4 ஆயிரம் குறைந்து பார் வெள்ளி 2 லட்சத்து 56 ஆயிரம் ரூபாய்க்கும் விற்றது. இந்த விலை குறைவு என்பது சில மணி நேரம் தான் நீடித்தது. மாலையில் மீண்டும் தங்கம் விலை அதிரடியாக அதிகரித்தது. அதாவது, நேற்று முன்தினம் மாலை தங்கம் விலை கிராமுக்கு ரூ.80 அதிகரித்து ஒரு கிராம் ரூ.12,600க்கும், பவுனுக்கு ரூ.640 அதிகரித்து ஒரு பவுன் ரூ.1 லட்சத்து 800க்கும் விற்பனையானது.

இதே போல மாலையில் வெள்ளி விலையும் கிராமுக்கு ரூ.1 அதிகரித்து ஒரு கிராம் ரூ.257க்கும், கிலோவுக்கு ரூ.1000 அதிகரித்து, பார் வெள்ளி 2 லட்சத்து 57 ஆயிரத்துக்கும் விற்றது. தங்கம், வெள்ளி விலை மீண்டும் அதிகரித்துள்ளது நகை வாங்குவோரை கலக்கமடைய செய்துள்ளது. நேற்று ஞாயிற்றுக்கிழமை என்பதால் தங்கம் மார்க்கெட்டுக்கு விடுமுறையாகும். நேற்றைய விலையை விட இன்று தங்கம் விலை உயர்ந்து விற்பனையாகிறது.