சென்னை: தங்கம் விலை வார இறுதி நாளான நேற்று அதிரடியாக பவுனுக்கு ரூ.1,360 உயர்ந்தது. இதேபோல வெள்ளியும் போட்டி போட்டு எகிறியது. தங்கம் விலை இந்த மாதம் தொடக்கத்தில் இருந்து ஏற்றம், இறக்கத்துடன் இருந்து வருகிறது. கடந்த 20ம் தேதி தங்கம் விலை குறைந்தது. அன்றைய தினம் பவுனுக்கு ரூ.800 குறைந்து, ஒரு பவுன் ரூ.92 ஆயிரத்துக்கு விற்றது. தொடர்ந்து, 21ம் தேதி தங்கம் விலை கிராமுக்கு ரூ.40 குறைந்து ஒரு கிராம் ரூ.11,460க்கும், பவுனுக்கு ரூ.320ம் குறைந்து, ஒரு பவுன் ரூ.91,680க்கும் விற்பனையானது.

இதேபோல வெள்ளி விலையும் கிராமுக்கு ரூ.4 குறைந்து ஒரு கிராம் ரூ.169க்கும், கிலோவுக்கு 4 ஆயிரம் குறைந்து, பார் வெள்ளி ரூ.1 லட்சத்து 69 ஆயிரத்துக்கும் விற்பனையானது. இந்நிலையில் வார இறுதி நாளான நேற்று தங்கம் விலை மேலும் குறையும் என நகை வாங்குவோர் எதிர்ப்பார்த்து இருந்தனர். ஆனால் மாறாக தங்கம் விலை நேற்று அதிரடி உயர்வையே சந்தித்தது. நேற்றைய தினம் தங்கம் விலை கிராமுக்கு ரூ.170 உயர்ந்து ஒரு கிராம் ரூ.11,630க்கும், பவுனுக்கு ரூ.1,360 உயர்ந்து ஒரு பவுன் ரூ.93,040க்கும் விற்றது. இதே போல நேற்று வெள்ளி விலையும் உயர்ந்தது. வெள்ளி விலை கிராமுக்கு 3 ரூபாய் உயர்ந்து ஒரு கிராம் வெள்ளி ரூ.172க்கும், கிலோவுக்கு மூவாயிரம் உயர்ந்து பார் வெள்ளி ஒரு லட்சத்து 72 ஆயிரம் ரூபாய்க்கும் விற்றது.