உலகளாவிய ஆட்குறைப்பு நடவடிக்கைகளை துவங்கிய ஆரக்கிள் நிறுவனம் இந்தியா, அமெரிக்கா மற்றும் மெக்சிகோ உள்ளிட்ட நாடுகளில் சுமார் 30,000 ஊழியர்களை பணி நீக்கம் செய்யும் அதிரடி நடவடிக்கையில் இறங்கியுள்ளது. ஆரக்கிள் நிறுவனம் தனது ஏஐ மற்றும் கிளவுட் பிரிவுகளை விரிவுபடுத்தும் திட்டத்தின் ஒருபகுதியாக, இந்தியா உட்பட உலகம் முழுவதும் சுமார் 30,000 ஊழியர்களைப் பணிநீக்கம் செய்யும் மறுசீரமைப்பு நடவடிக்கையை தொடங்கியுள்ளது.

பணி நீக்கம் செய்யப்பட்டுள்ள 30,000 ஊழியர்களில் 12,000 பேர் இந்தியர்களும் அடக்கம். பெரும்பாலான துறைகளில் மனிதவளத்திற்கு மாற்றாக உள்நுழைந்து வரும் ஏஐ தொழில்நுட்பத்தில் கூடுதல் முதலீடு செய்ய உள்ள நிலையில் ஆரக்கிள் நிறுவனம் இந்த ஆட்குறைப்பு நடவடிக்கையை முன்னெடுத்துள்ளது.

மேலும் பணி நீக்கம் செய்வதற்கு முன்பே தாமாக முன்வந்து ராஜினாமா செய்த ஊழியர்களுக்கு 2 மாத ஊதியத்தை நிறுவனம் இழப்பீடாக வழங்கியுள்ளதாகவும் தகவல் வெளியாகி இருக்கிறது. இதனிடையே ஆரக்கிள் நிறுவனத்தின் பணிநீக்க நடவடிக்கையால் பாதிக்கப்பட்ட மனிதவளத் துறையைச் சேர்ந்த ஒருவர்

“இந்தியாவில் ஏற்கனவே சுமார் சுமார் 12,000 ஊழியர்கள் பணிநீக்கம் செய்யப்பட்டுள்ள நிலையில் விரைவில் மற்றொரு பெரிய அளவிலான பணிநீக்கத்தை செய்ய நிறுவனம் திட்டமிட்டுள்ளது,” என்று கூறி இருக்கிறார். ஓராண்டு பணிநிறைவு செய்த ஊழியர்களுக்கு, பணிநீக்க நாள் வரையிலான ஒரு மாத ஊதியம், தகுதியின் அடிப்படையில் பணிக்கொடை (கிராஜிவிட்டி) மற்றும் ஒரு மாத முன்னறிவிப்பு காலத்திற்கான ஊதியம் ஆகியவற்றுடன் கூடுதலாக, 15 நாட்களுக்கான ஊதியத்தையும் வழங்க நிறுவனம் முன்வந்துள்ளது.

தவிர நிறுவனம் இரண்டு மாத ஊதியத்தை ஒரு கூடுதல் ஊக்கத்தொகையாக (Top-up) வழங்கவும் முன்வந்துள்ளது. எனினும் இந்த பணிநீக்க நிவாரணத் தொகுப்பானது நிறுவனத்திலிருந்து தாங்களாகவே முன்வந்து, இணக்கமான முறையில் ராஜினாமா செய்யும் ஊழியர்களுக்கு மட்டுமே பொருந்தும் என்றும் கூறப்பட்டடுள்ளதாக தகவல்கள் தெரிவிக்கின்றன. செயற்கை நுண்ணறிவு மற்றும் கிளவுட் உள்கட்டமைபு போன்றவற்றுக்கு தேவையான நிதியைத் திரட்ட நிறுவனம் தனது செலவினங்களைக் குறைக்கவும், கடன்களைச் சமாளிக்கவும் அதிரடி ஆட்குறைப்பு போன்ற மறுசீரமைப்பு நடவடிக்கைகளை மேற்கொண்டு வருவது குறிப்பிடத்தக்கது.