கோத்தகிரி, நவ.26: கோத்தகிரி அருகே ஈளாடா கதகட்டி பகுதியில் காட்டு யானைகள் நடமாடுவதால், மலைத்தோட்ட காய்கறி விவசாயிகள், தேயிலை தோட்ட தொழிலாளர்கள் கவனமுடன் இருக்குமாறு வனத்துறையினர் எச்சரிக்கை விடுத்துள்ளனர். நீலகிரி மாவட்டம், கோத்தகிரி அருகே ஈளாடா கதகட்டி பகுதியில் காட்டு யானைகள் நடமாட்டம் உள்ளதாக வனத்துறைக்கு தகவல் கிடைத்தது.
இந்நிலையில் இந்த காட்டு யானைகள் ஈளாடா அடுத்துள்ள வனப்பகுதியில் இருந்து வெளியேறி தற்போது ஈளாடா அருகேயுள்ள கதகட்டி பகுதியில் உலா வரத்தொடங்கி உள்ளது. மேலும் ஈளாடா மற்றும் அதனை சுற்றியுள்ள பகுதிகளில் அதிக அளவு மலைத்தோட்ட காய்கறிகள் பயிரிடப்பட்டு வரும் நிலையில், இரவு நேரங்களில் விளை நிலங்களில் புகுந்து மலைத்தோட்ட காய்கறிகள் பயிரிட்ட விவசாய நிலத்தை சூறையாடத் துவங்கி உள்ளது.
மேலும் பகல் நேரங்களில் தேயிலை தோட்டங்களில் உலா வரத்தொடங்கி உள்ளது. எனவே கதகட்டி கிராம மக்கள் அச்சமடைந்துள்ள நிலையில், மலைத்தோட்ட காய்கறிகள் பயிரிட்ட விவசாயிகள் மற்றும் தேயிலை தோட்ட தொழிலாளர்கள் பணிக்கு செல்ல அச்சமடைந்துள்ளனர். மேலும் காட்டு யானைகள் உலா வரும் நிலையில், கவனமுடன் பணிக்கு சென்று வனத்துறையினர் எச்சரிக்கை விடுத்துள்ளனர். இதையடுத்து குடியிருப்பு, விவசாய தோட்டங்கள், சாலைகளில் காட்டு யானைகள் உலா வராத வண்ணம் 24 மணி நேரமும் வனத்துறையினர் தீவிர கண்காணிப்பு பணியில் ஈடுபட்டு வருகின்றனர்.
The post கோத்தகிரி அருகே காட்டு யானைகள் நடமாட்டம் appeared first on Dinakaran.
