மாமல்லபுரம்: டிசம்பர் மாதம் 25ம் தேதி கிறிஸ்துமஸ் பண்டிகை கொண்டாடப்பட உள்ளது. இதனை முன்னிட்டு, மாமல்லபுரம், கோவளம் சாலையில் உள்ள ஒரு தனியார் நட்சத்திர ஓட்டலில் தங்கியிருந்த வெளிநாட்டு, உள்நாட்டு சுற்றுலாப் பயணிகள் கிறிஸ்துமஸ் பாடல்கள் பாடியும், ஆடியும் உற்சாகமாக கிறிஸ்துமஸ் பண்டிகையை வரவேற்று மகிழ்ந்தனர்.
இந்த, நட்சத்திர ஓட்டலில், பிளாஸ்டிக் பயன்பாட்டை தவிர்க்கும் விதமாக மரங்களின் கிளை மற்றும் இலைகளை கொண்டு வண்ண விளக்குகளால் கிறிஸ்துமஸ் மரம் அழகுர அலங்கரிக்கப்பட்டு இருந்தது. மேலும், கிறிஸ்துமஸ் தாத்தா போல் தலையில் தொப்பி அணிந்து கொண்டு சுற்றுலா பயணிகள், சிறுவர்கள், குழந்தைகள் என பலரும் கிறிஸ்துமஸ் பாடல்கள் பாடி மகிழ்ந்தனர். அந்த, ஓட்டலில் தங்கியிருந்த வெளிநாட்டு சுற்றுலா பயணிகளின் குழந்தைகள் பலரும் புத்தாடைகள் அணிந்தும், கிறிஸ்துமஸ் பாடல்களுக்கு ஏற்ப நடனம் ஆடினர்.
அட்வான்ஸாக கிறிஸ்துமஸ் பண்டிகை கொண்டாடி, உற்சாகமாக அனைவரும் தங்களது செல்போனில் செல்பி எடுத்து மகிழ்ந்ததை காண முடிந்தது. அவர்களுக்கு, ஓட்டல் நிர்வாகம் சார்பில் இனிப்புகள், கேக்குகள் மற்றும் இரவு உணவு வழங்கப்பட்டது. தொடர்ந்து, பிளாஸ்டிக் பொருட்களுக்கு மாற்றாக மரப்பலகை மூலம் செய்யப்பட்ட மரத் தொட்டியில் பாதாம், பிஸ்தா, முந்திரி, திராட்சை உள்ளிட்ட பல்வேறு வகையான உலர் பழங்களை போட்டு மூங்கில் துடுப்பு மூலம் கிறிஸ்துமஸ் கேக் கலவையை தயாரித்தனர்.
The post மாமல்லபுரம் நட்சத்திர ஓட்டலில் கிறிஸ்துமஸ் பண்டிகை கொண்டாடி சுற்றுலா பயணிகள் மகிழ்ச்சி appeared first on Dinakaran.
