ஊட்டி, பிப். 18: ‘வெல்லும் தமிழ்’ பெண்கள் பரப்புரை ஆலோசனை கூட்டம் ஊட்டி தெற்கு (மேற்கு) ஒன்றியம் குருத்துக்குளி கிராமத்தில் நடந்தது. ‘வெல்லும் தமிழ்’ பெண்கள் பரப்புரை ஆலோசனை கூட்டம் நீலகிரி மாவட்டத்தில் அனைத்து பகுதிகளிலும் நடந்து வருகிறது. இதன் ஒரு பகுதியாக ஊட்டி தெற்கு (மேற்கு) ஒன்றியம் குருத்துக்குளி கிராமத்தில் நடந்தது.
கூட்டத்திற்கு, ஊட்டி சட்டமன்ற தொகுதி திமுக பொறுப்பாளர் (மகளிர்) ராஜேஷ்வரி தேவபெட்டன் தலைமை வகித்தார். தெற்கு ஒன்றிய செயலாளர் ஜெகதீசன், பிஎல்ஏ ஈஸ்வரன் மற்றும் தாமஸ் ஆகியோர் முன்னிலை வகித்தனர். கூட்டத்தில், வெல்லும் தமிழ் பெண்கள் பரப்புரை குறித்து விவாதிக்கப்பட்டது.
மேலும், வரும் சட்டமன்ற தேர்தலின்போது, எவ்வாறு வீடு வீடாக சென்று பெண்கள் பரப்புரை மேற்கொள்ள வேண்டும்? என்பது குறித்து தெரிவிக்கப்பட்டது. வீடு, வீடாக சென்று அரசின் திட்டங்களை எவ்வாறு தெரிவிப்பது, அனைத்து அரசின் திட்டங்களும் மக்களுக்கு சென்றடைந்துள்ளதா? என கேட்டு பதிவு செய்ய வேண்டும் என தெரிவிக்கப்பட்டது. இதில், மகளிர் அணியை சேர்ந்த வாக்குச்சாவடி ஒருங்கிணைப்பாளர்கள் மற்றும் மகளிர் அணி நிர்வாகிகள் உட்பட பலர் கலந்துகொண்டனர்.
