மீண்டும் ஒரு லட்சத்தை நெருங்கும் தங்கம் விலை வரலாற்றில் முதன்முறையாக புதிய உச்சத்தில் வெள்ளி விலை

சென்னை: வரலாற்றில் முதன்முறையாக வெள்ளி விலை புதிய உச்சத்தை தொட்டுள்ளது. அதேபோன்று மீண்டும் தங்கம் விலை ஒரு லட்சத்தை நெருங்கியதால் பொதுமக்கள் கடும் அதிர்ச்சி அடைந்தனர். கடந்த 13ம் தேதி மட்டும் தங்கம் விலை பவுனுக்கு ரூ.1,160 உயர்ந்து, ஒரு பவுன் ரூ.1 லட்சத்து 120-க்கு விற்பனையானது. இதன் மூலம் தங்கம் இமாலய உச்சத்தை தொட்டது. இந்நிலையில், 15ம் தேதி ‘அந்தர்பல்டி’ அடித்து விலை குறைந்து காணப்பட்டது. நேற்று முன்தினம் நிலவரப்படி, கிராமுக்கு ரூ.165-ம், பவுனுக்கு ரூ.1,320-ம் குறைந்து ஒரு கிராம் ரூ.12 ஆயிரத்து 350-க்கும், ஒரு பவுன் ரூ.98 ஆயிரத்து 800-க்கும் விற்பனை ஆனது. இதன் மூலம் தங்கம் விலை மீண்டும் ரூ.1 லட்சத்துக்கு கீழ் வந்தது. இந்நிலையில், நேற்று தங்கம் விலை பவுனுக்கு ரூ.400 அதிகரித்து ஒரு பவுன் ரூ.99,200க்கு விற்பனை செய்யப்படுகிறது.

கிராமுக்கு ரூ.50 அதிகரித்து ஒரு கிராம் ரூ.12,400க்கு விற்பனை ஆகிறது. ஒரு பவுன் தங்கம் விலை ரூ.1 லட்சத்தை நெருங்கியதால் நகைப்பிரியர்கள் அதிர்ச்சி அடைந்தனர். பவுனுக்கு ரூ.1 லட்சத்தை தங்கம் விலை மீண்டும் நெருங்கிய நிலையில், வெள்ளி விலையும் வரலாறு காணாத புதிய உச்சத்தை எட்டி உள்ளது. இதன்படி வெள்ளி விலை கிராமுக்கு ரூ.11-ம், கிலோவுக்கு ரூ.11 ஆயிரமும் உயர்ந்து, ஒரு கிராம் ரூ.222-க்கும். ஒரு கிலோ ரூ.2 லட்சத்து 22 ஆயிரத்திற்கும் விற்பனை செய்யப்பட்டு வருவது பொதுமக்களை கடும் அதிர்ச்சியில் ஆழ்த்தியுள்ளது. இந்த விலை மாற்றங்கள், திருமணம் மற்றும் சுப நிகழ்ச்சிகளுக்கு நகை வாங்கும் குடும்பங்களுக்கு கூடுதல் சுமையாக மாறியுள்ளன. ஜிஎஸ்டி வரி(3%) மற்றும் உற்பத்தி செலவுகள் காரணமாக விலை இன்னும் அதிகரிக்கலாம் என நிபுணர்கள் எச்சரிக்கின்றனர்.