சென்னை: இந்தியாவின் முன்னணி ஓடிடி படைப்புகளை கவுரவிக்கும் நெக்ஸா இண்டியா ஸ்ட்ரீமிங் அகாடமி அவார்ட்ஸ் விழாவில், ‘சுழல் – சீசன் 2’ என்ற வெப்தொடரின் பின்னணி இசைக்காக, இசை அமைப்பாளர் சாம் சி.எஸ் மீண்டும் ஒருமுறை தேசிய அளவில் பாராட்டு பெற்றுள்ளார். ‘சுழல் – சீசன் 2’ வெப்தொடர் 3 விருதுகள் வென்றுள்ளது.
சிறந்த வெப்தொடருக்காகவும், சிறந்த நடிகையாக ஐஸ்வர்யா ராஜேஷும், சிறந்த பிராந்திய ஒரிஜினல் சவுண்ட் டிராக்கிற்காக சாம் சி.எஸ்சும் விருதுகள் பெற்றுள்ளனர். ‘சுழல் – சீசன் 2’ வெப்தொடரில் கிராம பின்னணி, மர்மம், குடும்ப உறவுகள், குற்ற விசாரணை ஆகியவற்றை இணைக்கும் வகையில் சாம் சி.எஸ் அமைத்த பின்னணி இசை, அந்த வெப்தொடரின் வெற்றியில் முக்கிய பங்காற்றியது.
தற்போது தமிழ், இந்தி, தெலுங்கு, கன்னடம் ஆகிய மொழிகளில் இசை அமைக்கும் சாம் சி.எஸ், தமிழில் ‘கராத்தே பாபு’, ‘சர்தார் 2’, புஷ்கர்-காயத்ரி இயக்கும் படம், அருள்நிதி நடிக்கும் ‘டிமான்ட்டி காலனி 3’, ஹெச்.வினோத்துடன் தனுஷ் இணையவுள்ள படம் உள்பட பல்வேறு படங்களுக்கு இசை அமைக்கிறார். நடிகர் ராம் பொதினேனி இயக்குனராக அறிமுகமாகி நடிக்கும் ஒரு தெலுங்கு படத்துக்கும் இசை அமைக்கிறார்.
