ரஜினிகாந்த் ரசிகனாக மாறிய கமல்ஹாசன்

கமல்ஹாசன் தயாரிப்பில் ரஜினிகாந்த், சிம்ரன், ராசி கன்னா நடிக்கும் படம், ‘தர்மன்’. இதை எழுதி இயக்கும் அஸ்வத் மாரிமுத்து கூறுகையில், ‘ரஜினிகாந்த் சார் நடிக்கும் படத்தை இயக்க வேண்டும் என்பது அனைத்து உதவி இயக்குனர்களுக்கும் இருக்கும் ஆசை என்று சொல்லலாம். ஆனால், கமல்ஹாசன் சார் தயாரிப்பில் ரஜினிகாந்த் சார் நடிக்கும் படம் என்பது ஒரு வரலாறு. அதில் நானும், எனது டீமும் ஒரு அங்கமாக இருப்பது மிகவும் சந்தோஷம். இது நான் இயக்கும் படம் மட்டும் இல்லை, நிறைய உதவி இயக்குனர்களுடைய கனவில் உருவாகும் ஒரு படம்.

அவர்களின் கனவை நான் எடுத்துக்கொள்கிறேன். அவர்களின் பிரதிநிதியாக இப்படத்தை சிறப்பாக உருவாக்கி கொடுக்க முடியும் என்று நம்புகிறேன். இப்படத்தை இயக்க வழிவிட்ட எனது புதுப்பட தயாரிப்பு நிறுவனமான ஏஜிஎஸ் எண்டர்டெயின்மெண்ட் மற்றும் சிம்புவுக்கு மிகவும் நன்றி. இசை அமைப்பாளர் அனிருத்துடன் முதல்முறையாக இணைகிறேன். படத்தில் மொத்தம் 8 பாடல்கள் இருக்கிறது. அனைத்துமே வெவ்வேறு ஜானர். ரஜினிகாந்த் சாரின் அறிமுக பாடலுடன் படப்பிடிப்பை தொடங்குகிறோம்.

கமல்ஹாசன் சார் மீது எப்போதுமே ஒரு பயம் இருக்கும். அவர் ஏதாவது கேட்டுவிட்டால், நமக்கு எதுவும் தெரியாதே. என்ன செய்வது என்பதால் அந்த பயம் ஏற்படும். ஆனால், அவரை நான் முதல்முறையாக பார்த்தபோது, சிம்பிளாக ஒரு விஷயத்தை சொன்னார். ‘நான் ரஜினிகாந்தின் ரசிகன். அவரது படத்தை நீங்கள் இயக்க வேண்டும்’ என்றார். பிறகு ரஜினிகாந்த் சாரை நேரில் சந்தித்தேன். கதை சொல்லி முடித்த பின்பு, அவரிடம் இருந்து ஒரு வாய்ஸ் நோட் வந்தது. ‘அஸ்வத்… கமல்ஹாசன் சாருடன் இணைந்து பணியாற்றுகிறோம். இப்படத்தை எப்படியாவது ஜெயிக்க வைத்துவிட வேண்டும்’ என்றார்.

அதை பார்க்கும்போது, அவர்களுக்கு 50 ஆண்டு கால திரையுலக அனுபவம் இருக்கிறது. ஆனால், முதல்முறையாக படத்தை உருவாக்குவது போல் பேசுகிறார்கள். அந்த எண்ணம்தான் அவர்களை இளமையாக வைத்திருக்கிறது. ரஜினிகாந்த் சார் என்னை ரொம்ப கம்பர்ட்டாக வைத்திருப்பார். இரவு 11 மணிக்கு போன் செய்து கதை குறித்து பேசலாம் என்றாலும் பேசுவார். மேலும், ‘நான் உனக்கு அசோசியேட் டைரக்டர் மாதிரி’ என்று சொல்வார். அவருடன் இணைந்து பணியாற்றுவது என்பது மிகவும் அற்புதமான அனுபவமாக இருக்கிறது’ என்றார்.