தூத்துக்குடி துறைமுகத்தில் கார் மெக்கானிக்காக இருக்கும் லெஜண்ட் சரவணன், மனைவி பாயல் ராஜ்புத் இல்லாத குறை தெரியாமல், தனது மகள் பேபி இயல் மீது பாசத்தை பொழிகிறார். சமூக விரோத கும்பலால் அவரது மகள் கடத்தப்படுகிறார். லெஜண்ட் சரவணா யார் என்று போலீஸ் உயரதிகாரி ஷாம் கண்டுபிடிக்கும்போது, பல எதிர்பாராத அதிர்ச்சி தகவல்கள் கிடைக்கிறது. லெஜண்ட் சரவணன் யார்? பேபி இயல் கிடைத்தாரா? குற்றங்கள் தடுக்கப்பட்டதா என்பது மீதி கதை.
மகளின் பாசத்துக்காக துடிப்பது, மனைவி பாயல் ராஜ்புத்தை சுட பயப்படுவது, எதிரிகளை ஆவேசமாக போட்டு பொளப்பது, சைலன்ட்டாக இருந்து காரியங்களை வயலன்ட்டாக செய்து முடிப்பது என்று, முழுநீள மாஸ் ஹீரோ கேரக்டரில் லெஜண்ட் சரவணன் அதகளம் செய்துள்ளார். கார்ப்பரேட் வில்லன் சந்தோஷ் பிரதாப் பற்றிய திடீர் திருப்பம் சூப்பர். போலீஸ் வேடத்தில் ஷாம், ஆண்ட்ரியா செம கெத்து காட்டியுள்ளனர். பாயல் ராஜ்புத் இயல்பாக நடித்துள்ளார். விடிவி கணேஷ், லால், அமிர்தா அய்யர், ஐஸ்வர்யா, ஜார்ஜ் மரியன் ஆகியோரும் கவனத்தை ஈர்த்துள்ளனர்.
சென்டிமெண்ட் வித் அதிரடி ஆக்ஷன் படத்துக்கான ஒளிப்பதிவில் எஸ்.வெங்கடேஷ் அசத்தியுள்ளார். எடிட்டர் பிரதீப் ஈ.ராகவ் பாராட்டுக்குரியவர். ஜிப்ரான் வைபோதா இசையில் ‘முத்தைத்தரு பத்தித் திருநகை’ முருகன் பாடல் உற்சாகமூட்டுகிறது. ரயில் மற்றும் ஜார்ஜியா சண்டைகளில், ஸ்டண்ட் இயக்குனர் மகேஷ் மேத்யூவின் கடுமையான உழைப்பு தெரிகிறது. தந்தை, மகள் பாசக் கதையை நேர்த்தியாக எழுதி இயக்கியுள்ள ஆர்.எஸ்.துரை செந்தில்குமார், லாஜிக் பற்றி கவலைப்படாமல், ஏகப்பட்ட ட்விஸ்ட்டுகளின் மூலம் பக்கா கமர்ஷியல் படத்தை தந்து, லெஜண்ட் சரவணனுக்கு தனி ரூட் போட்டிருக்கிறார்.
