சென்னை: ஜனநாயகன் திரைப்படம் ஜனவரி 9ஆம் தேதி வெளியாவதாக இருந்தது. ஆனால் சென்சார் பிரச்னை காரணமாக இந்த படம் வெளியாவதில் சிக்கல் எழுந்தது. உடனே சென்சார் சான்று வழங்க அதிகாரிகளுக்கு உத்தரவிடக் கோரி சென்னை உயர்நீதிமன்றத்தை கேவிஎன் தயாரிப்பு நிறுவனம் நாடியது.

அப்போது தனி நீதிபதி ஆஷா, ஜனநாயகனுக்கு படத்திற்கு உடனே தணிக்கை சான்றிதழ் வழங்குமாறு உத்தரவிட்டார். இதை எதிர்த்து தணிக்கை வாரிய அதிகாரிகள் மேல்முறையீடு செய்தனர். அந்த வழக்கில் நீதிபதி ஆஷாவின் உத்தரவை ரத்து செய்த நீதிபதிகள், மீண்டும் தனி நீதிபதியிடம் அனுப்பினர். பிப்ரவரி 10ம் தேதி தயாரிப்பாளர்கள் வழக்கை வாபஸ் பெற்றனர். இதையடுத்து படத்தை தணிக்கை குழுவின் மறு ஆய்வுக் குழுவுக்கு அனுப்ப உத்தரவிடப்பட்டது.

இதையடுத்து இந்த வழக்கு முடித்து வைக்கப்பட்டது. இப்போது இந்த படத்தை இதுவரை சென்சார் போர்டு பார்க்கவில்லை. இதையடுத்து படத்தின் ஓடிடி உரிமையை வாங்கிய அமேசான் நிறுவனம், படம் தாமதம் ஆவதால் அந்த உரிமையை ரத்து செய்திருப்பதாக கூறப்படுகிறது. இதனால் அமேசானிடம் வாங்கிய ரூ.120 கோடியை கேவிஎன் நிறுவனம் திரும்ப வழங்க வேண்டிய சூழல் ஏற்பட்டுள்ளது.