சென்னை: தமிழில் ஏ.ஆர்.முருகதாஸ் இயக்கத்திலும், சுதா கொங்கரா டைரக்ஷனிலும் இன்னும் பெயர் சூட்டப்படாத படங்களில் நடித்து வரும் சிவகார்த்திகேயன், அடுத்து `டான்’ சிபி சக்ரவர்த்தி இயக்கத்தில் நடிக்க கால்ஷீட் கொடுத்துள்ளார். இந்நிலையில், தனது பாலிவுட் அறிமுகம் குறித்து அவர் அளித்துள்ள பேட்டி வருமாறு: ஏ.ஆர்.முருகதாஸ் இயக்கத்தில் நான், ருக்மணி வசந்த் நடிக்கும் படத்தின் ஷூட்டிங் 90 சதவீதம் முடிந்துவிட்டது. தற்போது அவர் இந்தியில் சல்மான்கான் நடிக்கும் ‘சிக்கந்தர்’ படத்தை இயக்கி வருகிறார். அப்படத்தை முடித்ததும் இப்படத்துக்கான பணிகள் ஆரம்பமாகும். இது பக்கா கமர்ஷியல் அம்சங்களுடன் கூடிய ஆக்ஷன் படம் என்றாலும், வழக்கமான பாணியில் இருக்காது. சுதா கொங்கரா இயக்கும் படத்துக்கான ஷூட்டிங் தொடங்கிவிட்டது.
அதன் புரமோஷனுக்கான ஷூட்டிங் முடிந்துவிட்டது. இது ஒரு பீரியட் பிலிம். அதிகமான பொருட்செலவில் உருவாகிறது. வில்லனாக ஜெயம் ரவி நடிக்கிறார். அவர் எனக்கு சீனியர். அவர் நடித்த பல படங்கள் எனக்கு மிகவும் பிடிக்கும். இப்படத்தில் அவருடன் இணைந்து நடிக்கிறேன். விரைவில் நாங்கள் சண்டை போட இருக்கிறோம். இந்தி படத்தில் நான் நடிப்பதற்கான பேச்சுவார்த்தை நடந்தது. சில காரணங்களால் அது நிறைவேறவில்லை. ஆமிர் கான் சாரை பலமுறை நான் சந்தித்துப் பேசியிருக்கிறேன். எனது முதல் இந்தி படம் அவரது தயாரிப்பில்தான் வரவேண்டும் என்று வலியுறுத்தினார். அதற்கான கதை இருந்தால், உடனே தன்னிடம் கொண்டு வரும்படி சொல்லி இருக்கிறார்.
