வட மாநிலங்களில் நிலவும் கடுமையான குளிர், பனிமூட்டம் காரணமாக சென்னை விமான நிலையத்தில் 20க்கும் மேற்பட்ட விமானங்கள் தாமதம்

மீனம்பாக்கம்: டெல்லி உள்ளிட்ட வட மாநிலங்களில் கடந்த சில தினங்களாக கடுமையான குளிர், பனிமூட்டம் காரணமாக வட மாநிலங்களில் இருந்து வரும் விமானங்கள் தாமதமாக, சென்னைக்கு வந்து சேர்கின்றன. இதனால் சென்னையில் இருந்து கொல்கத்தா செல்ல வேண்டிய ஏர் இந்தியா எக்ஸ்பிரஸ் விமானம் சுமார் 5 மணி நேரமும், புனே செல்ல வேண்டிய இண்டிகோ ஏர்லைன்ஸ் விமானம் சுமார் 3 மணி நேரமும் மற்றும் பல இடங்களுக்கு செல்ல வேண்டிய 20க்கும் மேற்பட்ட விமானங்களும் தாமதமாக புறப்பட்டு செல்கின்றன.

இதனால் பயணிகள் கடும் அவதிக்குள்ளாகி வருகின்றனர். குறிப்பாக சென்னையில் இருந்து டிரான்சிட் பயணிகளாக செல்லக்கூடிய ஏராளமான பயணிகள் கடும் பாதிப்புக்கு உள்ளாகி வருகின்றனர். டெல்லி செல்ல வேண்டிய விமானம் தாமதமாக சொல்வதால், வெளிநாடுகளுக்கு டிரான்சிட் பயணிகளாக செல்வதற்காக, டிக்கெட்டுகள் முன்பதிவு செய்த பயணிகள், அங்கு தங்களுடைய விமானங்களை பிடிக்க முடியாததால் அவதிக்குள்ளாகி வருகின்றனர். மேலும் விமானங்கள் தாமதங்கள் குறித்து சென்னை விமான நிலையத்தில் பயணிகளுக்கு தகவல் தெரிவிப்பது கிடையாது.

எனவே முன்பதிவு செய்த பயணிகள், முன்னதாகவே சென்னை விமான நிலையத்திற்கு வந்து, காத்திருக்கின்றனர். மேலும் விமானங்கள் புறப்பாடு, வருகை குறித்து அறிவிக்கும் டிஸ்ப்ளே போர்டில் விமானம் குறித்த நேரம் போடப்பட்டிருக்கிறது. ஆனால் விமான கவுண்டரில் கேட்டால், அந்த விமானம் தாமதம் என்று கூறுகின்றனர். இதைப்போல் முரண்பட்ட தகவல்களால், பயணிகள் அலைக்களிக்கப்படும் அவல நிலை தொடர்ச்சியாக நடந்து வருகிறது. இவைகளை விமான நிலைய அதிகாரிகள் கண்காணித்து உரிய நடவடிக்கைகள் மேற்கொள்ள வேண்டும் என்று பயணிகள் தரப்பில் கூறுகின்றனர்.

The post வட மாநிலங்களில் நிலவும் கடுமையான குளிர், பனிமூட்டம் காரணமாக சென்னை விமான நிலையத்தில் 20க்கும் மேற்பட்ட விமானங்கள் தாமதம் appeared first on Dinakaran.