துணை முதலமைச்சர் உதயநிதி ஸ்டாலின் அய்யன் திருவள்ளுவர் சிலையின் வெள்ளி விழா கொண்டாட்டத்தையொட்டி, பொதுமக்களிடம் விழிப்புணர்வு ஏற்படுத்தும் வகையில் வடிவமைக்கப்பட்ட தமிழ்நாடு அரசுப் போக்குவரத்துக் கழக விரைவு பேருந்துகளின் பயணத்தை கொடியசைத்து தொடங்கி வைத்தார். தமிழ்நாடு துணை முதலமைச்சர் உதயநிதி ஸ்டாலின் இன்று (24.12.2024) சென்னை, அண்ணா சாலை பல்லவன் இல்ல மாநகர் போக்குவரத்துக் கழக மத்திய பணிமனையில் நடைபெற்ற நிகழ்வில், முத்தமிழறிஞர் கலைஞர் அவர்களால் கன்னியாகுமரியில் நிறுவப்பட்ட, உலக அளவில் புகழ்பெற்ற சுற்றுலாத்தலமான அய்யன் திருவள்ளுவர் சிலையின் வெள்ளி விழா கொண்டாட்டத்தை பொதுமக்களிடம் விழிப்புணர்வு ஏற்படுத்தும் வகையில் வடிவமைக்கப்பட்ட தமிழ்நாடு அரசுப் போக்குவரத்துக் கழகத்தின் 10 விரைவு பேருந்துகளின் பயணத்தை கொடியசைத்து தொடங்கி வைத்தார். வள்ளுவன் தன்னை உலகினுக்கே தந்து வான்புகழ் கொண்ட தமிழ்நாடு என்பது புகழ்மொழி. திருவள்ளுவர் இரண்டு வரிகளில், சாதாரண ஏழை எளிய மக்கள் தொடங்கி, பேரரசர்களும் பின்பற்ற வேண்டிய, உலக மக்கள் அனைவருக்குமான வாழ்வின் அறவழி முறைகளையும், கடைபிடிக்க வேண்டிய நெறிமுறைகளையும் அறம், பொருள், இன்பம் என வகைப்படுத்தி 1,330 திருக்குறள்களை 2,000 ஆண்டுகளுக்கு முன்பே இயற்றி உலக மக்களுக்கு, தமிழ்நாட்டின் வழிகாட்டுதலையும், சிறப்புகளை எடுத்து இயம்பினார்.

முத்தமிழறிஞர் கலைஞர் அய்யன் திருவள்ளுவர் இயற்றிய திருக்குறள் உலகில் உள்ள மிக முக்கியமான அனைத்து மொழிகளிலும் மொழிபெயர்க்கப்பட்டு பள்ளிகள் முதல் உலகிற் சிறந்த பல்கலைக்கழகங்கள் வரை பயன்படுத்தவும் நடவடிக்கைகளை மேற்கொண்டார். வள்ளுவரின் புகழை உலகமெங்கும் கொண்டு செல்ல முத்தமிழறிஞர் கலைஞர் சென்னையில் அமைத்த வள்ளுவர் கோட்டத்தோடு நில்லாமல், கடல் அலைகள் தாலாட்டும் குமரிக்கடல் நடுவே அய்யன் திருவள்ளுவருக்கு 133 அடியில் வானுயர சிலை அமைக்க முடிவு செய்தார். குமரியில் சிலை அமைக்க 1975-ஆம் ஆண்டே திட்டமிட்டாலும், அவரது கனவு நினைவாக பல ஆண்டுகள் காலம் ஆனது. 133 அதிகாரங்களை குறிக்கின்ற வகையில் முத்தமிழறிஞர் கலைஞர் 133 அடியில் சிலையை உருவாக்குகின்ற பொறுப்பை 1996 ஆம் ஆண்டில் சிற்பி கணபதி ஸ்தபதியார் அவர்களிடம் ஒப்படைத்தார்.செவ்வனே முடிவுற்ற திருவள்ளுவர் சிலையை 2000-ஆம் ஆண்டு ஜனவரி முதல் நாள் தொடங்கும் மணித்துளியில் முத்தமிழறிஞர் கலைஞர் தமிழ்நாட்டின் முக்கிய தலைவர்கள், தமிழறிஞர்கள் முன்னிலையில் மிகப் பெரிய விழா எடுத்து திறந்து வைத்து, உலக வரலாற்றின் முக்கிய மணித்துளியில் நடைபெற்ற ஒரே நிகழ்வாக இடம் பெறச் செய்தார்.

சிலை வடிவமைக்கின்ற பணி நடைபெறும்போதே “சிலை நிற்குமோ நிற்காதோ”- என்று சந்தேகமாக கேட்டவருக்கெல்லாம். பதில் அளிக்கும் வகையில் உலகையே உலுக்கிய ஆழிப்பேரலையை கட்டித் தழுவி, எந்தவித பாதிப்பும் இல்லாமல், கம்பீரமாக நிமிர்ந்து நின்று உலக தெலைக்காட்சிகளில் மீண்டும், மீண்டும் ஒளிபரப்பாகி அய்யன் முத்தமிழறிஞருக்கு உலக அளவில் புகழ் சேர்த்தது. திருவள்ளுவர் சிலை சிலை திறந்ததில் இருந்து இந்தியாவின் பல்வேறு மாநிலங்கள் மட்டுமல்லாது, உலகம் முழுவதும் இருந்து பலகோடி சுற்றுலா பயணிகளும் வருகைதந்து அய்யன் திருவள்ளுவர் சிலையை பார்வையிட்டுள்ளனர். தமிழ்நாடு முதலமைச்சர் மு.க.ஸ்டாலின் தலைமையிலான திராவிட மாடல் அரசு, உலக சுற்றுலா பயணிகளின் கவனத்தை ஈர்த்த அய்யன் திருவள்ளுவர் சிலை வெள்ளி விழா காண்பதையொட்டி, வருகின்ற டிசம்பர் 31-ஆம் தேதி மற்றும் ஜனவரி 1-ஆம் தேதி இரண்டு நாட்களும் வெள்ளிவிழா நிகழ்ச்சிகளை நடத்த முடிவு செய்திருக்கிறது. இந்த வெள்ளிவிழாவை முன்னிட்டு, பள்ளி மாணவர்களுக்கு கட்டுரைப் போட்டிகள். கல்லூரி மாணவர்களிடையே சோஷியல் மீடியாவில் ஷார்ட்ஸ் ரீல்ஸ் ஏ.ஐ மற்றும் டிஜிட்டல் தொழில்நுட்பங்கள் வாயிலாக திருக்குறளின் சிறப்பை உணர்த்தும் ஓவியப்போட்டிகள் நடத்தப்பட உள்ளன.

அய்யன் திருவள்ளுவர் சிலை நிறுவப்பட்டிருக்கின்ற இடங்கள் வரைபடத்தில் குறிக்கப்பட்டு எல்லோரும் தெரிந்து கொள்ளும் வகையில் காட்சிப்படுத்தப்பட உள்ளன. அய்யன் திருவள்ளுவரின் திருவுருவச்சிலை அருகே சீரொளிக் காட்சி (3D Laser) ஏற்பாடு செய்யப்பட்டுள்ளது. வெளிநாட்டில் இருக்கின்ற தமிழ் இணைய கழக மையங்கள், தமிழ்ச் சங்கங்கள், பிற மாநிலங்களில் இருக்கும் தமிழ்ச் சங்கங்கள், புது டெல்லியில் இருக்கும் தமிழ்நாடு இல்லம் ஆகியவற்றில் யூடியூப் மூலம் ஒளிபரப்பவும் ஏற்பாடு செய்யப்பட்டுள்ளது. டிசம்பர் 25 முதல் 30 வரை மாவட்ட அளவில் திருக்குறள் தொடர்பான கருத்தரங்கம், பேச்சரங்கம் நடத்தப்பட்டு பரிசுகள் வழங்கப்படவும் உள்ளது. அய்யன் திருவள்ளுவர் சிலை வெள்ளி விழா நிகழ்வுகளை மக்களிடம் கொண்டு சேர்ப்பதற்காக, விழிப்புணர்வு ஏற்படுத்தும் வகையில் வடிவமைக்கப்பட்ட தமிழ்நாடு அரசுப் போக்குவரத்துக் கழகத்தின் 10 விரைவு பேருந்துகளை தமிழ்நாடு துணை முதலமைச்சர் உதயநிதி ஸ்டாலின் இன்று கொடியசைத்து தொடங்கி வைத்து பார்வையிட்டார்.

இந்த 10 பேருந்துகளும் தமிழ்நாடு முழுவதும் உள்ள 38 மாவட்டங்கள் மற்றும் பெங்களூர் மாநகரத்திற்கு செல்லும் வழித்தட பேருந்துகளாக தேர்வு செய்யப்பட்டு அய்யன் திருவள்ளுவரின் உருவப்படங்கள் மற்றும் புகழினை தாங்கி பொதுமக்களுக்கு விழிப்புணர்வை ஏற்படுத்த உள்ளன. இந்நிகழ்ச்சியில் தமிழ் வளர்ச்சி மற்றும் செய்தித் துறை அமைச்சர் மு. பெ. சாமிநாதன், மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன், சென்னை பெருநகர மாநகராட்சி மேயர் திருமதி ஆர்.பிரியா, போக்குவரத்துத் துறை கூடுதல் தலைமைச் செயலாளர் திரு.க.பணீந்திர ரெட்டி, இ.ஆ.ப., தமிழ் வளர்ச்சி மற்றும் செய்தித் துறை செயலாளர் வே. ராஜாராமன்,இ.ஆ.ப., மாநகர் போக்குவரத்துக் கழக மேலாண் இயக்குநர் டாக்டர். ஆல்பி ஜான் வர்கீஸ், இ.ஆ.ப., செய்தி மக்கள் தொடர்புத் துறை இயக்குநர் மரு. இரா.வைத்திநாதன்.இ.ஆ.ப., தமிழ் வளர்ச்சித் துறை இயக்குநர் முனைவர் ந.அருள். நிலைக்குழுத் தலைவர் (பணிகள்) திரு.நே.சிற்றரசு மற்றும் அரசு அலுவலர்கள் கலந்து கொண்டனர்.

 

The post திருவள்ளுவர் சிலையின் வெள்ளி விழா சிறப்பு பேருந்து; தொடங்கி வைத்தார் துணை முதலமைச்சர் உதயநிதி ஸ்டாலின்! appeared first on Dinakaran.