திருச்சி, நவ.23: ‘சமூக நீதிக்கான தந்தை பெரியார் விருது’ பெற விரும்பும், தகுதியானவர்கள் உரிய ஆவணங்களுடன் மாவட்ட கலெக்டர் அலுவலகத்தில் விண்ணப்பிக்கலாம் என கலெக்டர் பிரதீப் குமார் தெரிவித்துள்ளார்.
சமூக நீதிக்காக பாடுபவர்களை சிறப்பிக்கும் வகையில் ‘சமூக நீதிக்கான தந்தை பெரியார் விருது’ கடந்த 1995ம் ஆண்டு முதல் அரசால் வழங்கப்பட்டு வருகிறது. சமூக நீதிக்கான தந்தை பெரியார் விருது பெறுபவருக்கு ₹5 லட்சம் விருது தொகையும், ஒரு சவரன் தங்கப்பதக்கமும் வழங்கப்படுகிறது. இவ்விருதாளர் தமிழ்நாடு முதலமைச்சரால் தேர்வு செய்யப்படுகிறார். 2024ம் ஆண்டுக்கான தமிழ்நாடு அரசின் ‘சமூக நீதிக்கான தந்தை பெரியார் விருது’ வழங்குவதற்கு உரிய விருதாளரை தேர்ந்தெடுக்க பரிந்துரைகள் வரவேற்கப்படுகிறது. எனவே இந்த விருதுக்காக விண்ணப்பிக்க விரும்புவோர், சமூக நீதிக்காக பாடுபட்டு, பொது மக்கள் தரத்தை மேம்படுத்த ஆற்றிய பணிகள் மற்றும் சாதனைகள் குறித்த தகவல்களுடன் தங்கள் விண்ணப்பத்தை மாவட்ட கலெக்டருக்கு அனுப்பி வைக்கலாம். விண்ணப்பதாரரின் விண்ணப்பம், சுயவிவரம், முழு முகவரி, தொலைபேசி எண், சமூக நீதிக்காக பாடுபட்ட பணிகள் குறித்த விவரங்கள் மற்றும் சாதனைகளை உள்ளடக்கியதாக இருக்க வேண்டும். விருதுக்கான விண்ணப்பங்கள் வந்து சேர வேண்டிய கடைசி நாள் டிச.20 ஆகும். இதற்கான விண்ணப்பங்களை மாவட்ட கலெக்டர் அலுவலக வளாகத்தின், இரண்டாம் தளத்திலுள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தில் பெற்று, பூர்த்தி செய்து, உரிய காலத்திற்குள் விண்ணப்பிக்க மாவட்ட கலெக்டர் பிரதீப்குமார் கேட்டுக்கொண்டுள்ளார்.
The post சமூக நீதிக்கான தந்தை பெரியார் விருது பெற விண்ணப்பிக்கலாம் appeared first on Dinakaran.
