மேட்டுப்பாளையம்: மேட்டுப்பாளையம்-கோத்தகிரி சாலையில் குட்டியுடன் 2 காட்டு யானைகள் உலா வந்ததால், போக்குவரத்து பாதிக்கப்பட்டது. மேட்டுப்பாளையம்-கோத்தகிரி சாலையில் கடந்த சில நாட்களாகவே காட்டு யானைகளின் நடமாட்டம் இருந்து வருகிறது. இந்த நிலையில் இரவில், மேட்டுப்பாளையம்-கோத்தகிரி சாலையில் 3வது கொண்டை ஊசி வளைவு அருகே குட்டியுடன் 2 காட்டு யானைகள் சாலையில் உலா வந்தன. இதைப்பார்த்த வாகன ஓட்டிகள், தங்களது வாகனங்களை ஆங்காங்கே நிறுத்தினர். மேலும் இதுகுறித்து மேட்டுப்பாளையம் வனத்துறையினருக்கு தகவல் அளித்துள்ளனர்.
இதையடுத்து விரைந்து வந்த வனத்துறையினர் சாலையில் உலாவந்த காட்டு யானைகளை நீண்டநேரம் போராடி வனப்பகுதிக்குள் விரட்டினர். இதனால், அச்சாலையில் சுமார் ஒரு மணி நேரத்திற்கும் மேலாக போக்குவரத்து பாதிக்கப்பட்டது. குட்டியுடன் காட்டு யானைகள் சாலையில் உலா வந்ததை வாகன ஓட்டிகள் தங்களது மொபைல்போனில் வீடியோவாக எடுத்து அதனை சமூக வலைத்தளங்களில் பதிவிட்டுள்ளனர். இந்த வீடியோ தற்போது சமூக வலைதளங்களில் வைரலாகி வருகிறது.
The post மேட்டுப்பாளையம்-கோத்தகிரி சாலையில் குட்டியுடன் நடமாடிய 2 யானைகள்: போக்குவரத்து பாதிப்பு appeared first on Dinakaran.
